Karsada gipasagdan ra

Kanunay lang maghuot ang mga sakyanan nga moagi sa Gorordo Avenue gikan sa Lahug. Daghan niini, igo lang moliko sa Escario Street paingon sa Cebu Business Park.

Kun ginindot pa sa kagamhanan sa dakbayan sa Sugbo ang Kamagong Street, ang karsada likod sa Lahug Elementary School ug adto molusot sa Escario, daghan unta nga motorista nga anha moagi diha.

Apan human nga gipangguba ang kabalayan nga gitukod na sa karsada pipila ka tuig na ang nakalabay, wala gayud atimana sa kagamhanan sa dakbayan ang pag-aspalto sa mao nga karsada.

Resulta, daghan sa mga mapahimuslanong tag-iya sa kabalayan ang mihinay-hinay na usab pagtukod og mga tindahan, ug mihimo nga grahe para sa ilang mga sakyanan sa daplin sa karsada.

Sigurado ko nga si Mayor Michael Rama wala na makaagi niini nga karsada. Sa pagsuwat nako niini nga lindog kagahapon, ako nga giteksan ang mayor ug gidasig nga moagi siya sa Kamagong Street.

Sa matag higayon nga makita nako ang obstruction sa karsada, dili nako kalikayan nga mosurok ang akong dugo ngadto sa mga sakop sa City Hall clearing team nga pakyas pagtuman sa ilang trabaho.

Hilasan na lagi ko nga molitok ug mosuwat sa kahulogan sa PROBE kay ang kahulogan sa una nga letra (Prevention) wala matuman. Maayo lang ilisan og pulong “pulpol.”

Kamo nga taga PROBE team, suroya ra gud ninyo ang Kamagong Street, dili ba makita ninyo og unsay angay nga lihukon kun nag-andar pa ang inyong mga utok!

* * *

Si kanhi kongresista Tomas R. Osmeña nakasabot nga dili dayon niya mausab ang baruganan sa uban nga taga Lahug nga sulod sa dugay’ng panahon nasilag kaniya.

Nakasabot si Tommy nga dili kay sulod lang sa 24 oras mausab niya ang baruganan sa mga lumolupyo. Apan nakasiguro si Tommy nga pinaagi sa tinuoray nga pagserbisyo, masabtan ra sa taga Lahug nga sayop diay ang ilang pagtuo kabahin sa iyang pagkatawo.

Duna man go’y mga kawani sa Lahug, apil ang ubang lumolupyo, nga nagduha-duha pa. Nabalaka sila nga ilaron ra sila ni Tommy. Unsaon man ‘sab gud kini si Tommy nga estrikto man kaayo’g hitsura ug tagsa ra mokatawa.

Lahi tinuod kaayo si Tommy kang Mayor Rama nga mokatawa dayon ug agbayan ka pa. Apan ako nga nasuheto ni Tommy, makaingon nga buotan ‘sab si Tommy apan mataha ka lang.

Nakagusto ko sa estelo ni Tommy nga dili siya magpanuko pagsalikway sa iyang amigo basta makasala, ilabi na kun maglambigit na og kurapsyon.