Reklamo sa piyansa ni Enrile

Wala mouyon ang upat ka mahistrado sa Korte Suprema sa hukom sa mayoriya sa ilang mga kauban nga mitugot ni Senador Juan Ponce Enrile nga makapiyansa sa iyang kaso nga Plunder.

Gihulagway kini nila nga usa ka special accommodation ang pagtugot sa 91-anyos nga si Enrile nga makaangkon og temporaryo nga kagawasan bisan og nag-atubang siya og kaso nga Plunder sa Sandiganbayan.

Matud pa sa mga wala makauyon sa hukom sa Korte Suprema nga dili maayo nga panag-ingnan ang mao nga hukom nga gibase lang sa “humanitarian consideration.”

Kun ngano nga gipapiyansa sa Korte Suprema si Senador Enrile posible nga dili lig-on ang ebidensya sa kaso nga gipasaka sa Ombudsman batok kaniya.

Kun nakahinumdom pa mo, ang mga abogado ni Enrile miduso og Motion for a Bill of Particular nga kun atong hubaron sa tinamban, motion nga iyang ipaklaro sa Ombudsman ang basehanan sa kaso nga gipasaka batok sa senador.

Si Enrile gipasakaan sa Ombudsman og kaso nga Plunder ug Graft and Corruption didto sa Sandiganbayan apan wala klaroha sa Ombudsman kun kanus-a mahimo ni Enrile ang kalapasan sa balaod nga naglambigit sa pagpangawkaw.

Kun wa ko masayop, gipaboran sa Korte Suprema si Enrile sa iyang giduso nga motion. Sa laktud, kay di pa man klaro ang kaso nga gipasaka batok ni Enrile, gitugotan siya nga makapiyansa.

Sigun sa atong batakang balaod, katungod ni Enrile nga masayod kun unsa ang matang sa kaso nga gipasaka batok kaniya aron klaro niyang mahimo ang iyang depensa.

Kun adunay pakasad-on sa pagkapiyansa ni Enrile, dili ang Korte Suprema, kun dili, ang Ombudsman nga nagdanghag sa ilang trabaho. Ang hukom sa Korte Suprema igo lang nila kini nga gipasubay sa balaod.