Pugson pagpabotar?

Posible ba nga ang mga trabahador sa lainlaing pabrika sa dakbayan sa Mandaue pugson sa ilang mga agawon aron adto mobotar pabor sa kandidato nga ilang magustohan nga padag-on pagka mayor?

Gitan-aw sa uban nako nga mga higala sa media nga posible nga ingon niini ang mahitabo kun mahinayon ang panagsangka nila ni Kongresista Luigi Quisumbing ug Konsehal Lolypop Ouano-Dizon pagka mayor sa dakbayan sa Mandaue karong sunod eleksyon.

Adunay nagtuo nga ang mga magpapatigayon sa Mandaue mopabor kang Luigi nga maoy mahimong mayor. Kun mahitabo kini nga pangagpas sa mga kauban ko sa media, kini maoy angay’ng pangitaan daan og alkontra ni Lolypop.

Apan, alang sa mga kawani sa lainlaing mga pabrika ug kompaniya, maayo ba gud nga pugson kamo sa inyong mga agawon pagpabotar sa kandidato nga wala kamo makagusto? Aw, kun nakagusto kamo sa tawo nga pabotahan kaninyo, walay problema. Kun wala gani, ayaw uy!

Para kanako, angay gayud nga limpyohon ni Luigi ang iyang kaugalingon niadtong report sa Commission on Audit (COA) nga ang iyang ngalan apil sa gikuswestyon sa paggamit sa iyang PDAF sa dili tukma nga paagi.

Alang kanako, hangtud nga dili pa malimpyohan ni Luigi ang iyang ngalan sa mao nga COA report, dili siya angay nga sublian sa katungdanan o kaha palingkoron sa laing puwesto sa kagamhanan.

Kini maoy rason ngano nga sa duha ka kandidato pagka mayor sa Mandaue, makaingon ko nga mas haum si Lolypop kay wala man g’yud kini malambigit og mga binuang atol sa iyang panerbisyo sa kagamhanan.

* * *

Uy, moabot diay sa Sugbo karong adlawa si Vice President Jejomar Binay! Hala, mag-boddle fight na ‘sab diay! Panghunaw mo’ng daan! Bitaw, ayaw gud mo patintal anang magkaon nga magkinamot kay lunlon ra g’yud na pagpaka-aron-ingnon sa mga mata sa katawhan.

Kun makakita pa lang mo sa tinuod, kana si VP Binay, mohungit ra g’yud na og pipila ka hungit dayon moundang na ug molakaw paingon sa sunod nga dapit nga iyang adtuonon.

Human sa “picture-taking” nga aron makita siya sa mga newspapers inigkaugma, kana si VP Binay moadto na sa mga mahalong kan-anan ug adto motarong pagkaon hangtud nga siya mabusog. He! He! He!

Ugma, dia ‘sab sa Sugbo si Presidente Aquino. Paminaw ko, moanhi ‘sab ang iyang kandidato pagka presidente nga si DILG Secretary Mar Roxas.

Awhag nako sa iyang mga security personnel, undanga na ang inyong kaestrikto sa media ha? Wala’y mopatay ni Mar dinhi sa Sugbo kay pinangga siya sa katawhan.