EDITORYAL - "Pwede na 'yan"

Samtang nagkainit na ang kawa sa politika nunot sa nagsingabot nga eleksyon sa sunod tuig, daw gibuboan og bugnaw nga tubig ang Armed Forces of the Philippines modernization nga gitagalan kutob 2028.

Ang mismong kadagkoan sa Department of National Defense ug AFP miangkon nang imposibleng makab-ot ang "minimum credible defense" sa termino ni Aquino, di kini ikatingala kay hangtud karon wa pa niya pirmahe ang duha ka tuig nang modernization plan diha sa iyang lamesa. Ang maong pamahayag nakapalagot sa mga netizens nga nagsunod sa kalamboan sa modernisasyon sa AFP.

Daghang kritiko sa modernisasyon sa AFP ang nakabantay sa mga senyales nga di seryoso ang defense officials makabaton og moderno ug ikaparang sa uban nga mga armas. Gikan pa lang sa pagpalit og barko sa navy hangtud na sa mga abyon sa air force makita gihapon ang "pwede na iyan" attitude.

Matud pa buwag ang pagpamalit sa mga armas, sensors, ug uban pang moderno ug importanteng ekipo niini , ang pangutana kanus-a kaha?

Ning bag-ohay lang, gipadaplin ang pagpalit og shore-based missile system (SBMS) nga magamit pangdepensa batok sa mga mosud sa teritoryo sa Pilipinas kay ipalit na lang og helmet ug bulletproof vest ang budget.

Ang rason mas dako kuno ang hulga sa internal threat sama sa mga rebeldeng Muslim, terorista ug komunista. Dugay na man ni, unsa may bag-o?

Ang modernisasyon sa AFP nagpokus di lang pagdepensa sa soberiniya ug teritoryo sa nasud kondili hasta na ang Humanitarian Assistance and Disaster Response (HADR).  Way bag-o niini, ang AFP pirmeng naa sa frontline sa HADR sukad pa kaniadto. Di ba maayong ang paliton modernong gamit na nga magamit sa external, internal defense ug HADR?

Kinsa may atong saligan sa  atong seguridad, ang ubang nasud?

Kining kawalay klaro sa modernisasyon sa AFP nakapadako sa ngisi sa China kay wa pa gani butobuto pildi na ang Pilipinas.