Lehitimong pangutana

Kun ako’y Mar Roxas ug ubang mga haligi sa Liberal Party, hunongan na lang nako og panguyab si Senador Grace Poe nga maoy ipares pagka-bise presidente sa 2016. Sa akong nabantayan, gigamit lang sa kampo ni Poe ang pagpasikat ug pagpadako sa iyang presyo sa politika.

Kagahapon, namasangil si Poe nga “may mga tao” si Mar nga maoy nagtira kaniya kalabot sa iyang “citizenship” ug “residency.” Si Rizalito David, kanhi kandidato pagka-senador sa Kapatiran party niadtong 2013, misang-at og kaso sa Senate Electoral Tribunal batok kang Poe nga matud ni David dili usa ka “natural-born” citizen.

Imbes mamasangil, maayo nga atubangon ni Grace ang maong kaso kay lehitimo kini nga pangutana sa iyang pagka-US citizen.

Tawo ba diay ni Mar si David?

* * *

Ang pag-resign ni Konsehal Mary Ann delos Santos isip minority floor leader sa konseho sa siyudad timailhan kini nga dili na g’yud siya sakop sa Team Rama. Dili na lang nato disturbohon asa siya mokuyog sa eleksyon sa 2016– BOPK ba o mag-independente.

Daku nga kaulawan sa grupo ni Mayor Mike Rama ang paggawas ni Mary Ann sa iyang team. Samtang makapanghambog kita nga nahalinan og yuta sa South Road Properties, gibiyaan usab siya sa iyang number one councilor.

Karon unta nga panahona nga maghangad kang Mike ang mga sakop sa Team Rama kay daghan na gud og kuwarta ang iyang administrasyon, apan wala mahangol si Mary Ann, mibulag hinuon kini.

Kun biyaan kita og konsehal, makapanghambog ba diay kita nga maayong lider?

* * *

Congratulations sa pamilyang Vestil sa Mambaling! Pormal na g’yud nga nabuksan ang F. Vestil  Street sa Barangay Mambaling niadtong Sabado. Ang karsada ginganlan agi’g pagtahod sa Mambalinganon nga si Francisco Vestil, ang apohan ni Konsehal Anne Marie Vestil Palomo.

* * *

Wala ko kauyon sa tubag nila ni Kongresista Luigi Quisumbing ug Mayor Jonas Cortes sa reklamo sa mga tawo (bisan sa mga netizens) sa wala’y kasulbaran nga trapiko sa Mandaue.  Matud ni Luigi nga maayo nga dawaton lang nato ang kadaot nga nahatag sa kahuot sa trapiko sa Mandaue kay ang rason niini mao man ang mga proyekto nga mobenepisyo sa mga tawo sa umaabot nga 15 ngadto sa 20 ka tuig.

Butangi! Sa ato pa, okay ra g’yud ni Luigi nga mag-trapik kita karon kay mabulahan kita sa umaabot nga duha ka dekada?

Gidasonan usab ni Jonas sa pag-ingon nga maayong mag-antos lang una ang mga tawo kay ang pagpamangag sa karsada, ilabi na sa A.S. Fortuna, makaayo ra sa umaabot.

Kun wala na g’yuy ikatubag sa “mismanagement” sa Mandaue, manghangyo na lang g’yud nga sabton lang ang resulta niini.