Ang mangosteen

Usa kini ka tropikal nga prutas, nga unang nadiskitahan didto sa isla sa Sunda nga sakop sa Indonesia. Og nikatap kini sa Thailand, Pilipinas ug sa tibuok rehiyon sa Southeast Asia. Linginon  ang gidak-on nga sagad 2-2.5 pulgadas, , nga ang kolor susama sa lomboy, ingo’g may berde’ng buwak ang bunga.

Niadto pa’ng ika-18 ka siglo, nahimo na’ng tradisyon nga gigamit kini’ng prutasa isip pang-alibyo o tambal, kun sa pamilya aduna’y gipamati nga bisan unsa nga sintomas sa mga sakit. Mokuha dayo’g bunga sa mangosteen, nga ipakaon ang tam-iso’ng unod ug ang bagal, lagaon nga imnon sama sa tsa.

Sa siyensya, tungod sa kaikag sa mga sayantista, sa katalagsaon niini’ng prutasa, nakahimo nag dagha’ng pagtuon ug ilang nadiskubrehan nga may daghan kini’ng mga benepisyo ang mahatag sa maayong panglawas. Ginganlan ang mangosteen og ‘King or Queen of the fruits’ nga nag-una sa mga nutrisyon.

Nabaniog nga sa atong nasud, nga unsa ma’y klase o ‘variety’ nga itanom dinhi nga prutas, nagbaton og mas may potensyal nga dasok sa ‘nutrients’. Mao usab ang mga plantasyon sa mangosteen sa Mindanao ug Palawan, anaa gyud gipananom taliwala sa ‘rain forests’ aron mamenusang  di maduhig sa polusyon.

Kaniadto daghan pa ko’ng nakita nga dagkong punoan nga nanurok sa palibot, karon gipamutol na, tingali wa pa mailhi ang dako’ng kabililhon niini. Barato kaayo ni kaniadto ug mangalata lang ang tagak nga bunga. Karon ang presyo, P150 pataas ang kilo, kay lagi nadiskubrehan na ang daku’ng benepisyo.

Busa kun duna mo’y punoan sa tugkaran ninyo, alimahe ug pabungaha’ng pahimusli nga kanunay mo makaon. Ayaw lang ilabay ang panit o bagal, paugha lang sa hangin, aron himoon nga imnonon isip tsa. Puwede sad ipagaling ang bagal aron isagol sa pagkaon, aron madugangan ang nutreyens sa lawas mo.