Ngano nga itago man ang atong kakabus?

Karong nagkaduol na ang mga tigum sa mga senior officials sa Asia Pacific Economic Cooperation (APEC) dinhi sa Sugbo, nakaplastada na ang kapolisan sa ilang security measures alang sa seguridad sa mga delegado.

Apil sa pagpangandam ang mga local government unit gikan sa mga dakbayan sa Sugbo, Lapu-Lapu ug Mandaue nga may direkta nga partisipasyon sa kalihukan sa APEC.

Sa niaging semana napahigayon na ang mock convoy alang sa rota sa mga delegado nga moadto sa mga venue sa ilang mga tigum. Gani wala ra maabti og 30 minutos, nakalusot dayon ang convoy gikan sa dakbayan sa Lapu-Lapu lahos sa dakbayan sa Sugbo.

Gawas sa traffic management, gipanindot usab ang mga dapit nga maagian sa mga delegado. Hinuon, wa pa mahuman ang pagpanindot sa Fuente Osmeña Rotunda. Niadtong Biyernes sa gabii, nahipos usab sa Cebu City Anti-Mendicancy Office ang 62 ka indibidwal nga nagpuyo daplin sa kadalanan.

Angkonon man o dili sa dakbayan sa Sugbo, apan ang ilang gihimo tataw nga paghipos sa maong mga tawo aron dili sila makita sa mga bisita.

Sa sayo pa, si Bise Gobernador Agnes Magpale namahayag nga dili kuno paghipos kun dili pagsagop ang himuon ilabi na sa mga bata sa kadalanan samtang magpadayon ang mga kalihukan sa APEC.

Apan ang akong pangutana kinsa may mosagop nila? Asa man sila ipahiluna? Kun mahuman na ang mga tigom sa APEC dinhi sa Sugbo mahimo na ba sila nga mobalik sa pagsige og bahasbahas sa kadalanan?

Ang 62 ka indibidwal nga nahipos sa taga Cebu City Anti-Mendicancy Office temporaryo nga gibutang sa gymnasium sa Barangay San Roque.

Matud sa taga Cebu City Anti-Mendicancy Office magpabilin sila sa gym hangtud makahukom sila nga manguli sa ilang mga probinsya. Apan kun dili sila mouli?

Ang uban gani nahibulong ngano nga sa kadugay na nila nga nagpuyo daplin sa kadalanan karon pa sila gihipos.

Kinsa ba ang dili gusto og hamugaway nga pagpuyo? Bisan gani sa kapobrehon, palasyo na alang sa mga nagpuyo ilawom sa mga gubaon nga building ang ilang mga barung-barung nga ginama lang sa karton, sako ug gision nga mga tarpulin.

Apan ngano nga sa kadalanan sila nagpuyo? Tungod kay anaa diha ang ilang panginabuhian. Isip host province, natural nga tarungon nato sa pag-abi-abi ug hatagan sa nindot ug maayo nga serbisyo ang atong mga bisita.

Apan ngano nga sa mga bisita ra man kita makahatag niana?  Kita diay? Sa traffic pananglitan, ngano nga mapangitaan man og sulbad nga mapasayon ug paspas ang biyahe sa mga delegado? Kita diay?

Sa paghipos sa mga bata sa kadalanan ug mga nagpuyo daplin sa kadalanan ngano nga mapangitaan man og paagi nga mahipos sila bisan temporaryo lang?

Ngano nga dili man nato sila mapahiluna og tarung ug mahatagan sa batakan nila nga panginahanglan aron dili na sila mobalik sa kadalanan?

Ang katuyoan sa APEC mao man unta ang pagtinabangay nga mapalambo ang mga sakop nga nasud niini, ngano nga ato man itago ang kamatuoran nga kita nagkinahanglan og tabang sa atong kakabus?