Dili unta kurakoton

Bilyonaryo na ang kagamhanan sa dakbayan sa Sugbo human nga ang Ayala-SM Prime Holdings Corporation ug ang Filinvest Land Incorporated mibayad na g’yud sa dugang P6.75 Bilyones pagpalit nila og 45 hektareyas nga yuta sa South Road Properties.

Kun idugang nimo ang pasiuna nga P1.6 Bilyones nga security bond nga una nilang gibayad, ang tanang kantidad nga nadawat sa dakbayan sa Sugbo miabot na og kapin sa P8 Bilyones.

Angay’ng magpasalamat si Mayor Michael Rama ngadto ni kanhi kongresista Tomas R. Osmeña nga maoy naninguha kaniadto aron makahuwam og daku’ng kantidad ang dakbayan sa Sugbo gikan sa Japan nga gigamit pag-ugmad sa South Reclamation Project.

Nakasabot ko ngano nga wala malipay si Tommy bisan og gilitok ni Mayor Rama ang iyang ngalan atol sa iyang State of the City Address (SONA).

Unsaon, nga samtang kapila gibalik-balik ni Mayor Rama ang paglitok niya sa ngalan ni kanhi mayor Alvin Garcia nga kuno kabahin sa pagmugna sa SRP, kausa ra niya gilitok ang ngalan ni Tommy.

Bisan og ako pa si Tommy mahiubos ko kay hapit na lang dili niya hisgotan ang ngalan sa iyang kontra sa politika apan ang ngalan ni Alvin Garcia gibalikbalik.

Apan sagdi na lang. Kalimtan usa nato ang politika niining higayona. Kinahanglan nga siguroon usab ni Mayor Rama nga ang mga proyekto nga gastohan sa mao nga kuwarta dili kay himuon lang pangwarta sa ubang opisyal.

* * *

Angay’ng badlongon ni DILG Secretary Mar Roxas ang iyang mga bodyguard nga puwerte kuno nga estriktoha. Nakasabot ko sa kaubanan nako sa media nga puwerteng sukoa.

Mura’g gisunod sa mga escort ni Mar ang gihimo sa mga tigbantay ni Presidente Aquino nga hilabihang garaa. Mura g’yud og si kinsa sila nga pagkatawo.

Ang media dili mopatay sa ilang boss, mao nga dili nila angay nga estriktohon.

Ang mga suod ni Mar Roxas dinhi sa Sugbo ako na nga giawhag nga pahibaw-on nila ang ilang kandidato pagka presidente nga kun ingon niini ang buhaton sa mga escort ni Mar sa sunod higayon, sawayon sila sa mga sakop sa media.

Sagdi lang, pasayloon usa nato. Wala man ‘sab g’yuy laing mokandidato nga angayan nga suportahan sa pagka karon.

Tinuod, anaa si Senador Grace Poe apan, mosugot ba kamo nga itugyan ang pagdumala sa atong nasud sa tawo nga wala pa’y kasinatian?

Ang resulta diha kun si Poe ang makadaog, lahi ang maisip nga presidente nga maoy magsige’g mandar kaniya unya si Poe igo lang tigpirma sa dukomento pareho kaniadto ni Erap.