Unsa'y nagpaabot sa CICC?

Sa matag agi nako sa Ouano Avenue sa North Reclamation Area (NRA) sa dakbayan sa Mandaue, bisan unsaon nako og lingiw nga dili ko makakita sa nagusbat na nga Cebu International Convention Center, sama sa may magnet g’yud sa akong mga mata nga makatutok ug makapanghupaw sa makalolooy nga hitsura sa dul-an usa ka bilyon ka pesos nga kantidad sa gipasigarbo unta nato nga pang "world class" nga convention center.

Napalpak ang gipasiatab nga pang world class convention center. Gikwestiyon ang kalit nga pagburot sa budget, ug ang giingon nga sub-standard nga materyales nga gigamit pagtukod sa building. Human sa ASEAN summit niadto’ng 2007, giplanohan unta kini nga himoon nga venue sa mga "world class" nga mga exhibit ug mga concert.  Apan wala mahatagi og katumanan.

Nakahinumdom ko sa concert sa Cascades diha sa CICC nga nireklamo ang lead singer sa grupo nga si John Gummoe tungod kay nagsige og feedback ang iyang microphone ug dili klaro ang accoustic.

Susama usab ang reklamo sa Apo Hiking Society kaniadto. Human niadtong duha ka concert wala nako makadungog nga may lain pa nga concerts sa CICC. Sulod sa lima ka tuig human sa katukoran sa CICC niadtong 2006, naklaro dayon ang daghang depekto.

Mas nisamot ang makalulooy’ng sitwasyon sa CICC atol sa 7.2 magnitude nga linog niadtong 2013.

Maayo na lang nga wala mahugno ang building. Apan gihimo na lang kini nga bodega sa mga relief goods. Dul-an duha ka tuig human sa linog, hitsura na sa usa ka skeleton ang building.

Daghan ang dili makatuo nga ang estraktura sa CICC gitukod ug gigastohan og dul-an P1 ka bilyon. Wala gani maabti og napulo ka tuig gikan sa iyang paghimo, gubaon na kaayo ang CICC.

Bisan ang mga ordinaryo nga tawo makapangutana ug makatandi.  Mas maayo pa ang usa ka ordinaryo nga balay nga ginama sa amakan ug sin kay molungtad pa og dugay kay sa building nga gitukod og dul-an sa usa ka bilyon ka pesos nga wa man lang gani maabti og dekada, guba na.

Karon nga nitugot na ang Visayas Ombudsman nga ayuhon ang CICC, bisan kun may mga kaso pa nga naglambigit niini nga wala pa maresolbar, unsa'y gamit unya niini?

Adunay mga sugyot nga kun dili man mokita ang CICC alang sa mga exhibit, himoon na lang kini nga terminal. Mas maayo pa siguro tungod kay sentro kini alang sa mga biyahe sa amihanang Sugbo.

Subo lang hunahunaon nga mura’g nausik lang ang kuwarta nga pinatoan sa singot sa mga Sugbuanon tungod kay ingon sa giusikan lang sa pagpatukod sa CICC.