Asa ang bayad sa SRP

CEBU, Philippines - Nangutana ang mga konsehal nga sakop sa BOPK kun hain na ang halin sa 45 hektareyas nga yuta sa South Road Properties (SRP).

Kini human gipahibawo ni Mayor Mike Rama nga iya na nga gihatag ang Notice of Awards ngadto sa Ayala Land-SM Prime Holdings Consortium ingon man sa Filinvest Land Incorporated nga maoy nakapalit sa yuta.

Ang paghatag ni Mike sa Notice of Awards gihimo sa wala pa makapagawas og resolution ang BOPK-dominated City Council nga nagpugong sa mayor sa pagdawat bayad sa yuta.

Nagdumili hinuon ang mayor pagtubag sa pangutana kun hain ang halin sa SRP. Si Konsehal Margot Osmeña ug Sisinio Andales miingon nga kun ang Notice of Award nahatag na sa mayor ngadto sa nakapalit sa SRP dapat anaa na usab ang bayad.

Kay ngano man kuno nga mohatag og Notice of Award ang mayor kun wala pa ang bayad? Lihitimo kini nga pangutana sa mga konsehal nga sakop sa oposisyon busa kinahanglang deritsohon kini sa pagtubag sa mayor ug dili kay likoy-likoyon.

Gusto lang kita nga makaseguro. Ako nagduda nga ang kampo sa mayor adunay gitagoan nga sekreto nga dili nila gusto nga mahibaw-an aron ang oposisyon dili makahimo og mga lakang nga makapugong sa ilang mga laraw.

Sa pagkakaron, ang duha ka kampo sa politika sa dakbayan sa Sugbo, daw sama sa nagduwa og piyat-piyat.

Dili sila gusto nga mahibaw-an ug mabasa ang ilang mga baraha aron dili makadepensa ug makapangandam ang ilang mga kontra, aron sa pagdiga sa ilang baraha sila ang daug ug pilde ang kontra.

Pero lain pa’y ato mayor, dili man ko konsehal sa dakbayan sa Sugbo nga sakop sa oposisyon, tug-ani kuno ko, unsa man, naa na nimo ang bayad sa SRP? Sekretoa lang ko sa pagsulti mayor.