Tuga-tuga og pakaon unya di diay mokaon

Sa wala pa mahitabo ang aksidente sa Eskina Canduman nga mikalas og kinabuhi sa usa ka pastor ug basketball coach, relaks kaayo ang traffic managers sa dakbayan sa Mandaue. Nagkara-kara na usab sila og superbisar sa trapiko sa lugar human sa dugoong aksidente.

Siyam ka tuig na ang nakalabay, nagkagusbat matag adlaw ang trapiko sa Mandaue. Apan ang pagdumala ni Mayor Jonas Cortes sa trapiko sa lugar igo ra g’yud sa kara-kara, wala’y positibo nga resulta.

Kumusta na ang one-way traffic scheme sa mga daku’ng karsada sa Mandaue? Sumala sa mga taga-Mandaue, wala gihapo’y alibyo kay dili tukma ang mga pamaagi pagpatuman niini tungod sa kakulang kun aduna may “time and motion studies” sa dili pa i-implementar sa Traffic Enforcement Agency of Mandaue ang mando ni Jonas.

Hapit na ang APEC meetings dinhi sa Sugbo karong bulana hangtud Septiyembre, apan kun ingon gihapon ka makalagot ang trapiko sa Mandaue nga mopakagot sa bag-ang sa mga “lider” nga moanhi sa Sugbo, mao ra g’yud kini maghatag og kaulawan sa Pilipinas ngadto sa ubang nasud sa Southeast Asia.

* * *

Naghisgot man kita’g Mandaue, nakakatawa ko sa estorya sa akong higalang nakatambong sa “kaon-kaon” nga gi-host ni Kongresista Luigi Quisumbing didto sa ubos sa Marcelo Fernan Bridge. Nagyawyaw kuno ang mga bugoy sa lugar kay klaro ra g’yud nga pag-selfie ra ang kaonkaon.

Misamot akong katawa sa dihang gi-text niya nga usa ra g’yud ka lumpia ang gikuha ug gikaon ni Luigi samtang ang uban nagkasingot sa paghungit sa ‘bodol fight’ kay naklaro hinuong giluod ang kongresista.

Kun mao kini ang estelo ni Luigi, maglisod siya’g apas kang Konsehal Lolypop Ouano-Dizon nga maayo kaayo nga mogakos sa mga senior citizens, sa mga babaye ug mga youth nga bisitahan sa mga sitio sa Mandaue.

Mao kini angay hunahunaon ni Luigi kun mopatuo siya ni Jonas nga siya ang mag-mayor sa Mandaue. Maayong ipakita niya nga kaya niyang mabuhat ang gihimo ni Lolypop ngadto sa masa sa Mandaue.

Ang pagpaduol sa mga tawo importante kaayo. Bisan magpabaha pa og kuwarta ang mga Quisumbing sa Mandaue, koprason ra kini sa mga botante nga naagbayan, nahimamat, ug nagakus ni Lolypop.

* * *

Hain naman ang saad ni Mayor Mike Rama nga “relocation site” alang sa mga pamilya nga gipang-demolish sa Doña Pepang Cemetery?

Kun pulos lang saad si Mike, dili siya makamahay kun pagatawgon siya sa mga tawo og “bakak king” daw baki nga magsige lang og sabwag og “bakak.”

Nagsalig ang mga gipangdemolis nga ibalhin, apan kun pamolitika lang kining kang Mike, wala g’yuy mapaabot ang mga tawo. Bakak ra g’yud diay.