Wa masayop si PNoy

Para kanako, wa g’yud mosipyat si Presidente Aquino sa pagtuboy niya kang DILG Secretary Mar Roxas nga maoy iyang suportahan nga mopuli kaniya sa pagdumala sa atong nasud.

Ngano nga nakaingon ko nga si Roxas maoy tukma nga mopuli kang Presidente Aquino? Tungod kay si Roxas adunay daku nga kasinatian sa pagdumala sa kagamhanan, isip usa ka magbabalaod ug executive official. 

Apan labaw sa tanan, sulod sa taas niya nga pangatungdanan sa kagamhanan isip magbabalaod ug secretary sa Department of Trade and Industry (DTI), Department of Transportation and Communications (DOTC) ug DILG, wala g’yud kita makadungog nga aduna siya’y binuang.

Sa ato pa, takus si Mar Roxas nga makapadayon sa programa ni Presidente Aquino nga “Tuwid na Daan” apan angay lang hinuon nga pilion g’yud ni Mar kun kinsa ang iyang mga opisyal nga magpalibot unya kaniya kun siya modaog pagka presidente.

Dinhi sa Sugbo, si kanhi kongresista Tomas R. Osmeña wala mopasalig nga maka-deliver siya og mayoriya nga botos para kang Mar Roxas apan matud niya nga hangyuon niya ang mga tawo nga suportahan si Mar.

Tan-aw hinuon nako, kun ayuhon lang pagtan-aw sa mga tawo ingon man ang paggamit sa ilang mga utok, ngano nga adto man tawon kita mobotar sa mga tawo nga adunay daghang pasangil sa kurapsyon.

Si Senador Grace Poe maayo ‘sab nga kandidato apan ang nakaapan lang g’yud kay wala pa siya’y kasinatian kay pila pa lang gud ka tuig nga nahimo siya nga magbabalaod.

Usahay gani mahiubos kita nga maghuna-huna nga diha’ng miaplay si Grace Poe sa pagka American Citizen ug mipuyo didto sa America sa taud-taud nga katuigan, mipirma siya og dukomento nga misalikway na sa Pilipinas ug gipalabi ang America.

Apan kay lagi maayo man siya kuno nga moserbisyo, angay usa siya nga mag-bise presidente lang aron nga kun may katakus na siya human sa unom ka tuig, tukma na siya unya sa 2022.

* * *

Karon nga klaro na nga si Mar Roxas maoy kandidato pagka presidente sa Partido Liberal, angay na nga maghinay-hinay siya pagpanghipos sa mga butang niya sa DILG.

Nasiguro ‘sab g’yud hinuon ko nga mao kini ang buhaton ni Mar. Matag-an man gud ni’ng daan. Aw sumala, di ba kadaghan man nako nga gibalik-balik nga si Mar g’yud ang ituboy ni PNoy?

Matud ni Mayor Mike Rama nga tukma na nga mobiya si Mar sa DILG sama sa gihimo ni Vice Presidente Jejomar Binay nga mi-resign sa pagka sakop sa gabinete ni Presidente Aquino.