Tabangay ta

Ang AUTOMATIC, gituhoan nga mao’y epektibong sulbad sa nagkagrabe’ng trapik. Nga nakahasol pag-ayo sa inadlaw nato’ng pagbiyahe sa kadalanan. Atrasado nga kanunay malangan sa naandan nato’ng trabaho o gimbuhaton.

Ang AUTOMATIC, sa di madugay kun ang tana’ng sakyanan aduna na niini, dili na magtrapik kay haytek na ni, diin magkasinabtanay na’ng may kortisiya o magrespetohay na ang mga isigka-awto. Susama ni’s tawo’ng may kabuot.

Ang AUTOMATIC, usa ni ka gadget nga sa CNN, usa ni sa 10ka maayong imbensyon sa 2013. Itaud kini ubos sa manobela nga nakakonektar sa atong selpon. Tingali may ‘Iphone apps’ na’ng pinaagi sa ‘bluetooth’ nga makonek ni’s ‘onboard’ nga kompyuter sa awto. Mosaler lang sa awto nga model 1996 pataas.

Ang AUTOMATIC, morehistro o morekord kini sa tana’ng impormasyon o performance sa awto o bisan sa drayber mopahimangno sa dinad-an o kalapasan sa trapiko. Mosignal sab ni kun may madetek nga kakulian sa awto. Hayahay kaayo ang nagmaneho kay ang awto man ang nagkontrol sa pagpadagan.

Ang AUTOMATIC, bisa’g asa o nag-unsa ni, kompleto marebyu ang tana’ng biyahe ini pinaagi sa GPS. Mohatag sab ni’g grado sa drayber kun maayo ba modala sa awto, nga morag grado sa karaoke kun maayo ka’ng mokanta. Mo-‘flash-warning’ sab ni kun may madetek nga ‘imminent danger’ o disgrasya.

Ang AUTOMATIC nga gadget, anaa na kini sa merkado, tag-$100 lang nga gipanghimo sa ‘Automatic Labs’, San Francisco, California. Tingali pipila ka tuig gikan karon, ang mga bag-o’ng awto pulos na aduna’y ‘built-in automatic gadget’, aron pag-‘enhance’ sa mga mas moderno’ng sakyanan sa umaabot.