EDITORIAL - “Daang matuwid”

Dili lamang exclusive sa usa ka grupo ang “daang matuwid.” Kini maoy gipamulong ni Sen. Grace Poe kinsa usa karon sa gihugon-hugonan nga mokandidato sa pagka-presidente o bise presidente sa nasud sa 2016.

Tinuod ang maong pamahayag ni Poe, bisan kinsa mahimong mosubay sa tul-id nga dalan. Si Poe usa unta sa nabaniog nga mamahimong ka-tandem ni Interior Secretary Mar Roxas kinsa mao nay gipaila ni Aquino kagahapon nga standard bearer sa Liberal Party.

Way kwestyon kun si kinsa man ang pilion sa katawhan nga mosunod nga presidente sa nasud, basta siguro lang nga ang iyang interes mao ang kaayohan sa nasud ug dili sa iyang personal ug sa iyang pamilya.

Mahinungdanon kaayo nga ang mapiling pangulo mao kadtong dili na ihalas sa trabaho. Kinahanglang kadtong aduna nay ideya kun unsaon pagpadagan sa nasud ug mopatigbabaw sa kaayohan sa mga Filipino.

Mas maayo gani kun ang mosunod nga presidente kadtong may klaro nang tamdanan kun unsaon pagpadayon ang mga maayong reporma nga ibilin unya sa administrasyong Aquino.

Usa sa nakapahinay sa pag-abante sa Pilipinas mao ang pagsige og ilis og presidente gikan sa managlahing partido. Ang resulta, ang bag-ong presidente magsugod na usab og lain niyang mga programa nga pahaom sa iyang plano.

Dugang pa niini ang pag-angkon sa dungog nga bunga sa iyang administrasyon ang maong mga programa kay di nila madawat sa partido nga silay nagpadayon o nitiwas sa mga maayong programa sa ilang mga kaatbang sa politika, kay lagi di tibuok ang pagdayeg nilang madawat.

Tungod niini nga paagi, atras-abante ang dagan sa Pilipinas. Way nahuman  kay pulos lamang sinugdanan.