Ayaw'g patuo Jonas

Maayong sundon ni Kongresista Luigi Quisumbing ang tambag sa iyang apohan, ang negosyanteng si Dr. Norberto Quisumbing Jr. nga padayonon na lang niya ang iyang pagpangalagad isip representante sa ika-unom nga distrito, kay sa magpadala sa hulhog ni Mayor Jonas Cortes nga magbaylo sila – si Luigi mag-mayor sa Mandaue ug si Jonas sa kongreso.

Gisulti na kini sa ubang kolumnista ug komentarista, apan gusto nako nga balikon nga mas makaserbisyo si Luigi sa katawhan sa Mandaue, Consolacion ug Cordova kun motiwas siya sa iyang termino pagka-kongresista.

Dili na bag-ong kongresista si Luigi nga dali pa makahupot og komitiba. Kay naa na man siya sa ikatulo nga termino, posibleng mahimo siya’ng chairman sa gamhanang komitiba kay miyembro man siya sa Liberal. Mas dako ang iyang tabang sa siksto distrito kun mahimo siyang chairman sa komitiba.

Ug kun mopatuo siya ni Jonas, mura ra siya’g naghikog sa iyang politikanhong karera kay iyang makontra si Lolypop Ouano-Dizon nga nakagamot pag-ayo sa masa sa Mandaue. Bisa’g magpabaha pa ang mga Quisumbing og kuwarta, koprason ra g’yud na sa mga Mandauehanon nga nailang “clannish voters.” Si Luigi dili taga-Mandaue.

Husto si NQ sa iyang pamahayag sa unang semana ning bulana. Kun mopadayon si Luigi sa kongreso, mas daghan ang mabulahan. Ang kanta-kanta ni Mayor Teresa Alegado sa Consolacion nga “Nanghihinayang, nanghihinayang ang puso namin” dili na kana madayon.

* * *

Daghang nalipay sa SONA ni Presidente Noynoy Aquino kay iyang gihisgutan ang anti-dynasty bill nga gusto niyang mapaspasan og pasar sa kongreso.

Apan daghang magbabalaod ang wala mouban sa pakpak sa mga tawo kay utro silang maigo kun mapasar ang balaod nga magdili na pagpadagan sa mga sakop sa pamilya sa usa ka opisyal.

Utro pud si Bise Presidente Jejomar Binay, seguradong maigo kun mapasar ang anti-dynasty bill. Samtang siya ang bise presidente, napiling senador ug kongresista ang duha niya ka anak, samtang mayor sa Makati city iyang junior nga bag-o lang gisuspenso sa Ombudsman.

Kaniadto, iyang asawa nga si Dr. Elenita Binay mipuli niya pagka-mayor sa Makati. Dili kini ikalipay ni Binay. Niadtong miaging semana iyang gipahibalo sa usa ka panagtigum nga gusto niyang ilibkas ang balaod nga nag-limit sa termino sa usa ka piniling opisyal aron wala na kini limit.

Dili g’yud mahimo kining pagkahakog sa gahum. Dili na mahatagan ang uban og kahigayonan nga makapapili kun sila na lang sa usa ka pamilya ang magpulipuli.

Usa pa, ma-obserbahan nato sa mga lungsod o siyudad nga kun gikan sa usa ka pamilya lamang ang magpulipuli pagdumala, wala g’yuy kalambuan ang lugar.

Adunay giingon nga “ang tulo ka termino nga siyam ka tuig taas ra sa tapulan ug kurakot nga opisyal, apan mubo ra sa kugihan ug matinud-anong opisyal.”