Brgy Cabangahan, Consolacion, Cebu

“Puwerte g’yud nga bahoa sa mga trak sa basura nga moagi diri sa among dapit. Mga bata namo diri nasakit na tungod sa baho sa basura.”

Brgy Bagalnga, Compostela, Cebu

“Wala na g’yud atimanan kining karsada namo paingon sa Sitio Tagaytay kay manggawas na ang mga bato sa karsada kun mag-uwan. Kuyaw kaayo nga mapuspos ang mga motorista nga mangagi.”

Brgy Tubod, Minglanilla, Cebu

“Diri sa among barangay nanghatag og ‘tag P1,000 sa mga senior citizens pero gipili ra man ang gipanghatagan, ang may SSS ug GSIS ra man ug kanang nagkalisod g’yud kuno.”

Brgy Tayud, Consolacion, Cebu

“Nagpasalamat mi sa bag-ong hepe namo sa polis diri sa among lungsod kay kugihan kaayo manakop og mga badlungon sama sa mga drug pushers. Unta magpadayon ni kay basin sa pagsugod ra ni.”

Brgy Buaya, Lapu-Lapu City

“Diri sa Saac 1 likud sa Cebuana, ang mga basura baho kaayo gipasagdan lang ug wala g’yud kuhaa. Wala man g’yud molihok ang mga sakop sa clean and green sa barangay.”

Brgy Subangdaku, Mandaue City

“Sa Sitio Riverside naay poste sa VECO o PLDT ba ni nga nagbarug pero panit na lang sa kahoy ang nalubong sa yuta kay nadunot na ang kahoy. Maayo unta og maatiman dayon ni kay uso na ra ba karon ang tumba sa mga poste.”

Brgy Luhod, Barili, Cebu

“Maayo unta og mabadlong ang mga magtutudlo sa Federico & Soledad MNHS nga ang mga computers sa eskwelahan wala man g’yud ipagamit sa mga estudyante, mi-graduate na lang ang ubang mga bata. Among nahibaw-an nga mga maestra ra ang mogamit pero magpabayad sa mga bata sa pagpa-print sa mga test papers.”

Brgy Kanluhangon, Tabuelan, Cebu

“Puwerte’ng daghana nga langaw diri tungod aning poultry nga duol ra sa mga balay, hasol kaayo ini’g pangaon kay ang gisukad tapuk-an dayon sa langaw. Wala man g’yud ni hatagi’g aksyon nga kuyaw man kaayo ni sa panglawas sa mga tawo, labi na sa mga bata.”

Brgy Kamputhaw, Cebu City

“Dugay na kaayo ni’ng poste diri sa Queens Road dapit sa Shakeys nga gipasandig ra man sa mga wires, ngano’ng wala man g’yud ni matagad? Atimanon na unta ni kay kuyaw nga naay madisgrasya nga mga tawo kun matumba ni.”

Brgy Lapaz, Bogo City

“Gisemento na g’yud tawon ang karsada diri sa eskena sa barangay hall. Ang eskena Banban na pud ang wala maatiman. Maayo unta’g isunod ‘sab dayon ni’g trabaho ug paspasan, dili pareho sa una nga igo ra gisugdan unya dugay kaayo nga gihuman.”

Alang sa inyong mga reklamo text lang sa 09062973166