EDITORYAL – Kurapsyon nagpadayon

Ang “Tuwid na Daan” nga maoy slogan ni Presidente Aquino nga gusto niya’ng ipatuman sa iyang administrasyon ingon sa lisud pa kaayo mahatagan og katumanan.

Mag-unsa man kun dili kurakot ang presidente sa nasud apan wala pa mapuo ang mga corrupt nga opisyal sa lainlaing ahensya sa kagamhanan?

Susama ra kana dinhi sa dakbayan sa Sugbo nga samtang gibalik-balik kanunay ni Mayor Michael Rama nga dili siya corrupt nga pagkatawo apan iya usab nga giangkon nga dili siya sigurado nga wala’y kurakot sa pipila sa iyang mga sinaligan.

Mag-unsa man ang singgit ni Presidente Aquino nga sumpoon sa iyang administrasyon ang pangurakot apan wala kini ipatuman sa iyang mga sinaligan sa lainlaing ahensya?

Nasumpo na ba gud ang mga tawo diha sa Bureau of Customs (BOC) ug Bureau of Internal Revenue (BIR) nga motuyo g’yud sa pagpagamay sa kwentada sa buhis sa usa ka taxpayer bugti sa ibayad kanila nga kantidad?

Nahunong na ba ang binuang sa ubang opisyal sa Department of Public Works and Highways (DPWH) nga modemanda og komisyon gikan sa mga kontraktor sa lainlaing proyekto nga ilang ipatuman?

Wala na ba g’yud mahitabo nga adunay mga huwes sa lainlaing hukmanan nga modawat og suborno aron nga ang disisyon sa kaso mopabor ngadto sa mohatag og daku’ng suborno?

Tungod sa daku nga panginahanglan ug sa pagkahanaw na sa moralidad sa katawhan pagka karon mao nga dali ra kaayo kini matental sa mga suborno nga makahatag kanila og kaayohan.

Ang unom ka tuig nga kampanya batok sa graft and corruption kuwang pa aron hingpit nga makab-ot ang katumanan sa gitinguha ni Presidente Aquino nga “matuwid na daan.”