Fight g’yud Tom!

Husto kaayo ang gihimo ni kanhi mayor Tomas R. Osmeña nga gipaundang na lang niya ang pag-ihap pag-usab sa resulta sa eleksyon dinhi sa dakbayan sa Sugbo kaniadto’ng 2013.

Para nako, wala na’y kapuslanan pa kun padayonon ang pag-ihap pagbalik sa resulta sa eleksyon kay mapupos na lang ang termino ni Mayor Michael Rama, dili pa mahuman ang mao nga gimbuhaton.

Tiaw mo, sulod sa duha ka tuig sa 592 ka presinto nga giprotestahan nila ni Tommy, ang 119 pa lang ang natagad sa Comelec-First Division didto sa Manila.

Ang husto mao nga mag-usab na lang sila si Mayor Tommy ug Mayor Mike sa eleksyon karong 2016. Anha diha maila kun kinsa gayud kanila ang pinangga sa katawhan.

* * *

Dinhi sa Sugbo, nakita nako nga dili kaayo sikat si Senador Grace Poe kun itandi nila ni DILG Secretary Mar Roxas ug ni Davao City Mayor Rodrigo Duterte.

Sa survey sa radyo nga gipasiugdahan ni Arangkadista Leo Lastimosa sa DYAB mura’g kusog si Mar Roxas, apan sa laing survey nga gihimo ni Gerry Auxilio sa DYSS, nag-una ‘sab si Duterte.

Wala manimaho si Vice President Jejomar Binay sa survey. Wala na man hinuon kaayo ko mahibulong nga nagkabonbon ang simod ni Binay dinhi sa Sugbo kay siyaro og dili sila makasabot.

Si Grace Poe wala g’yud hinuon magkabonbon ang simod sa survey apan lupig g’yud siya nila’ng Roxas ug Duterte.

Apan may higayon pa tingali si Binay nga makabawi pinaagi sa pagpanubag kun ngano nga puwerte man nga mahala sa gipatukod nga Makati City Parking Building diha nga siya pa ang mayor?

Angay usab niya tubagon ang giingon nga pag-angkon niya og kapin sa 300 ka hektareya nga hacienda didto sa Rosario, Cavite nga adunay piggery nga air-con.

Pinangga si Duterte dinhi sa Cebu kay mura’g gusto man ang mga Sugboanon nga patyon ang mga badlongon sama sa gihimo didto sa Davao. Unya si Roxas sikat ‘sab kay wala man g’yuy isyu bisan gamay.

* * *

Kun dili modayon si Kongresista Luigi Quisumbing sa pagdagan pagka mayor sa Mandaue, sila si Mandaue City Mayor Jonas Cortes maoy magsangka pagka kongresista.

Aw, hinuon kay incumbent man si Luigi, mura’g maglisud g’yud si Jonas kay wala man kini magustohi sa katawhan base sa akong pagpanuki-duki.

Dili ‘sab tingali ni mag-bise ni Konsehal Lollipop Ouano-Dizon si Jonas kun molansar na si Lollipop pagka mayor. Kun magbise siya’ng Lollipop, ambot makadaog pa ba nga wala man siya makasulbad sa grabe’ng traffic sa Mandaue.