Palagputon ang SSPX

Gahapon pa kong nahibawo nga nagkasungi diay ang duha sa labing bantogang tigpanalipod sa Simbahang Katoliko sa Sugbo nga silang Dr. Marcelo Bacalso ug Talisay City Councilor Soc Fernandez. Katam-is kaha sa mga tigpamaba sa ubang mga relihiyon nga naapiki sa nangaging katuigan sa ilang pakiglalis nilang Bacalso ug Fernandez karong nagka-unay nang duha ka labing lantip nga tighubad sa bibliya.

Nasentro sa panagsungi nilang Bacalso ug Fernandez ang agresibong kampanya sa Society of St. Pius X (SSPX) pagbanhaw sa karaang mga misang Latin sa wa pa usba sa Second Vatican Council (1962-1965) nga nagtugot sa paglitok sa misa sa lokal nga mga pinulongan.

* * *

Nanawag si Bacalso sa Arangkada sa DYAB Abante Pa, Bisaya! gahapon aron pagmatuod nga sakop siya sa SSPX dinhi sa Sugbo. Matod ni Bacalso andam siyang momatuod ngadtong Fernandez ug ni bisan kinsa nga mokuwestiyon sa ilang baruganan nga ang karaang mga misa mao ang tinuod nga balaanong sakramento sa Simbahang Katoliko.

Gidapit ni Bacalso ang publiko pagsabot sa SSPX pinaagi sa pagtambong sa misang Latin matag Domingo sa sayong gabii sa simbahan sa Omapad, Mandaue City uban sa wa niya ilha nga Amerikanhong pari. Nipahibawo siya nga laing misang Latin gipahigayon sa simbahan sa Cansojong, Talisay nga giduma ni Msgr. Cristobal Garcia sa wa pa siya papahawaa sa Artsidyosesis sa Sugbo.

* * *

Nikumpisal si Bacalso nga nagsugod siya pagkuwestiyon sa bag-ong misa human gidasig ni Pope Benedict XVI ang pagsaulog sa Tridentine Mass pinasikad sa Roman Missal nga maoy gigamit sa simbahan gikan sa 1570 hangtod sa 1962. Mas popular na karon ang Missal ni Pope Paul VI nga gipagawas niadtong 1969.

Matud ni Bacalso naibanan ang kabalaanon sa misa tungod sa pagtalikod sa pari sa sakristiya, gawas nga giusab di lang ang pinulongan kon dili apil nang unod sa mga pung ug pangaliya sa misa, ug sa pagtugot sa mga layko sa pag-apil pagpakalawat sa balaanong ostiyas.

* * *

Nagdumili si Bacalso pagdason sa pagkuwestiyon sa SSPX sa ka-lehitimo sa liderato ni Pope Francis. Apan niangkon nga gipaluyohan niya ang kampanya pagpabalik ni Pope Benedict XVI sa katungdanan. Mora hinuon og maglisod si Bacalso pagkumbinser sa mga Sugbuanon sa iyang kawsa ug di ni tungod kay mas maayong mopasabot si Fernandez kon dili tungod sa kalisod sabton sa Latin.

Kasagaran sa mga tigpaminaw nga nitawag ug ni-text namo niawhag nga palagputon ang mga pari ug mga madre nga sakop sa SSPX. Nabalaka silang mabuak ang Simbahang Katoliko kun magpadayon ang SSPX pag-ordinar sa ilang kaugalingong mga obispo ug sa hingpit nga pagsalikway sa Vatican. Gawas sa talagsaong popularidad ni Pope Francis, lisod pasabton ang katawhan unsaon nila pagpangaliya isip katilingban kun di makasabot sa Misa.

[email protected]