Pag-obserbar sa mga adlaw sa Semana Santa

Ang kamingaw sa palibot atol sa pag-obserbar sa mga adlaw sa Semana Santa naggumikan kini kay gawas nga bakasyon na sa mga tinun-an, daghan usab ang mamauli ngadto sa tagsa-tagsa nila ka dapit aron sila makabakasyon ug makapahimulos sa mga adlaw nga wala’y trabaho.

Kini ang hinungdan nga sa Semana Santa, masinati g’yud ang pagnihit sa mga pasahero nga sagad mag-atang sa kadalanan kay daghan man ang namakasyon ngadto sa nagkalainlaing lugar nila sa probinsya ug mamalik lang kini liwas na sa maong mga adlaw.

Ang pagsaulog sa mga adlaw sa Semana Santa matag tuig balit-ad kaayo sa atong masinati sa pagsaulog sa Pasko nga makita nato ang madasigong katawhan nga namalit og mga butang sa lainlaing department stores.

Apan ang mga Katoliko niini’ng adlaw sa Semana Santa labing siguro nga ang kadaghanan kanila adto mag-ambahan sa mga simbahan aron pagtambong sa mga kalihokan nga gipasiugdahan sa kaparian.

Dako kaayo’ng sukwahi sa pagsaulog sa Pasko nga ang katawhan  atong makita nga maghugop sa dagko’ng mga Mall aron pagpalit og mga butang ug ang pipila kanila adto magtapok sa maanindot nga mga lugar nga sila makalingawlingaw.

Ang katawhan gipahinumdoman ni Arsobispo Jose Palma nga ang Semana Santa dili maoy adlaw sa paglingaw-lingaw, kondili, mao kini ang adlaw nga angay  nga maghinulsol kita sa atong nahimo’ng kasaypanan.

Apan kadto’ng nahinayak na nga maglingaw-lingaw atol sa Semana Santa, angay’ng hinumdoman nila ang pahimangno sa kapolisan nga siguroon nila nga dili mabiktima ang ilang panimalay sa mga kawatan.

Ang kabomberohan mipahimangno usab nga magmatngon ang tagbalay nga malikayan ang sunog sa ilang panimalay atol nga kini ilang gibiyaan kay tua sila naglingaw-lingaw.

Ang paglikay pagsul-ob og mahalon nga mga alahas o pagdala og dako’ng kantidad nga salapi sa maong mga adlaw sa Semana Santa nalakip sa mga pahimangno sa kapolisan ug ang kabomberohan mipasidaan nga pagngon ang kuryente sa mga appliances sa dayong pagbiya sa panimalay nga wala’y tawo.