EDITORYAL – Seklista silotan ‘sab

Daghan kaayo nga miangkon’g environmentalist midasig g’yud sa mga tawo nga magbisekleta ug usahay pasirad-an pa gani nila ang karsada aron lang magamit kini sa mga seklista.

Samtang nindot ang ilang tumong, apan kini’ng miangkon’g mga environmentalist nakalimot pag-awhag sa mga seklista nga ilang gisuportahan nga dili sila molapas sa balaod sa trapiko.

Sagad g’yud nga ang mga tawo nga magbisekleta, bata man o edaran na, dili mutahod og traffic signal light. Bisan og “stop light” pa gani, apan ang mga seklista mopaturatoy lang gihapon sa pagpadagan nga nakahatag og risgo sa mga motorista.

Kun kini’ng mao nga mga seklista madam-agan sa mga sakyanan kay wala mutahod sa traffic signal system, sigurado nga mag-atubang gihapon og problema ang mga drayber kang kansang sakyanan nakadam-ag kanila.

Angay gayud nga dakpon sa mga traffic enforcers ang mga tawo nga magbisekleta unya dili motuman sa traffic rules. Kay wala man sila’y lisensya pagmaneho’g bisekleta, angay nga adunay mugnaon nga ordinansa ug pamultahon ‘sab ang mao nga mga seklista nga abusado.

Sa paghimo niini, magmatngon na ang mga seklista ug dili na basta-basta nga mupadayon sa pagtabok sa karsada nga stop pa ang signal kay makahatag sila og risgo sa ubang motorista nga makaaksidente sa ilang kaabusado.

Kun aduna may karsada nga sirad-an aron ipagamit sa mga seklista nga igo lang mag-ehersisyo ug maglingaw-lingaw, angay nga adto kini himoa sa mga karsada nga mingaw ug panagsa ra ang moagi nga sakyanan.

Dili ‘sab maayo nga ang sirad-an nga karsada aron lang ipagamit sa mga seklista mao ang mga karsada nga sagad agian sa daghang sakyanan sama sa General Maxilom, Osmeña Boulevard, Escario ug Gorordo Avenue sahe sa gihimo pipila ka buwan ang milabay.