Ilegal suwertres gipasagdan

Makapahibulong kaayo kun ngano nga nagpabiling hilom ang kapolisan ug wala gayud mohimo’g kampanya sa midagsang na kaayo nga ilegal suwertres dinhi sa dakbayan.

Husto g’yud diay ang akong nadawat nga report pag-adto nako sa Davao nga giprotehean og kapolisan ug ubang inpluwensiyado nga mga tawo ang ilegal suwertres operation dinhi sa siyudad.

Tiaw mo, bisan og si Mayor Michael Rama mihatag na og kamandoan kang Senior Superintendent Marciano Batiancela, ang bag-ong acting direktor sa kapolisan sa dakbayan, apan wala g’yud gihapon molihok ang mga polis.

Ako pa g’yud mismo ang mitug-an ni Batiancela sa pagdagsang na sa ilegal suwertres dinhi sa dakbayan sa Sugbo apan wala pa sila’y gihimo’ng labok. Nagpadayon ang ilegal nga kalihukan sa mga suwertres operator.

Gani, aduna may ushers sa suwertres nga moanhi sa silong sa among opisina ug manghagad nga papaliton ta og numero. Sa miagi’ng semana, nagpaayo ko sa akong aircon sa sakyanan, duna sa’y namaligya og numero.

Mga reporter sa City Hall mitug-an nako nga bisan sa ilang dapit midagsang ang ilegal suwertres. Kusogan kuno kini kay makapalit ka og usa ka peso, dos pesos, singko pesos, unya dagko ang debedendo.

Apan diha ‘say higayon nga adunay usher nga wala motahan sa daug mao nga wala na kini mobalik pagsuroy sa iyang sagad suroyanan. Kun dili kini aksyonan sa mga polis, may katinuoran g’yud giprotehean nila.

Hatagan nato’g higayon si higala’ng Kernel Batiancela nga molihok.

* * *

May tinguha ang mga opisyal sa Barangay Kamagayan nga sila ang mo-operate og pay parking area sa yuta sa siyudad diha sa ilang barangay.

Para nako, nindot man kay barato-barato ra ang ilang pagpabayad apan kinahanglang bahinan nila ang City Hall. Mao kini ang tan-awon pag-ayo sa committee on laws, ordinances and good government nga gipangulohan ni Konsehal Sisinio Andales.

Adunay lagda diha sa gipasar nga ordinansa sa Barangay Kamagayan nga kuyaw sa pangwarta. Samtang ilang gitataw nga ang resibo nga i-isyu nila nakarehestro sa BIR, apan may pakapin.

Kun mahutdan kuno og official receipt nga narehestro sa BIR, mahimo ra kuno nga “acknowledgment receipt” ra ang ihatag ngadto sa nagbayad nga motorista.

Ha! Ha! Ha! Anaa diha magsugod ang tinonto. Bisan og aduna pay resibo, mahimo’ng ang tigkolekta moingon nga nahutdan sila og official receipt. Sa ingon nga paagi, mahimo’ng adunay hukos-pukos aron nga ang kuwarta nga makolekta mabulsa. Bisan pa og moingon mo nga dunay pirma sa tresurera sa barangay ang acknowledgment receipt. Tun-i og maayo ni uy.