Sayop sa mga Binay

Ang kampo sa mga Binay angay’ng maminaw sa argumento ni Senador Miriam Defensor-Santiago nga katungod sa Department of the Interior and Local Government (DILG) ang pagmando og preventive suspension sa mga lokal nga opisyal nga mag-atubang og bug-at nga kaso.

Dili baya basta-basta nga pagka-abogado si Senador Santiago mao nga angay nila nga tun-an ang hukom sa Korte Suprema nga gibasehan sa senador sa pagpagawas niya sa iyang argumento.

Matud ni Senador Santiago nga klaro kaayo sa ruling sa Korte Suprema (Gobenciong vs Court of Appeals)  kaniadto’ng 2008 nga dili na kinahanglang maghuwat ang DILG kun aprobahan ba ang Temporary Restraining Order nga giaplay sa hukmanan aron pugngan ang pagpatuman sa kamandoan sa Ombudsman.

Pagka karon, mura na hinuon og nahimo’ng duha ang mayor sa Makati City kay wala man mopahawa sa iyang opisina si Mayor Erwin Binay bisan og nakapanumpa na ang iyang bise mayor.

Nagpaniid ko niini’ng mao nga isyu ug nasuta nako nga binuang kaayo ang gihimo sa mga Binay. Una, nanghagit nga si DILG Secretary Mar Roxas maoy mo-serve sa suspension order nga giisyu sa Ombudsman.

Sa akong pagtimbang-timbang, ang gihimo ni Mayor Binay makadaot hinuon sa kandidatora unya sa iyang amahan nga si Bise Presidente Jejomar Binay nga nagtinguha nga mag-presidente.

Bisan og dili mga abogado klaro man kaayo nga masabtan. Ang kamandoan sa Ombudsman nga nagbutang ni Mayor Binay ubos sa preventive suspension napatuman na. Kini pinaagi sa pagpapanumpa sa bise mayor nga maoy acting mayor.

Nahimo ang pagpanumpa sa acting mayor sa wala pa moisyu ang Court of Appeals ug Temporary Restraining Order kon TRO. Unsa pa may pugngan sa TRO nga nakapanumpa na man ang bise mayor? Dili ba sayon ra man sabton?

Ang kampo ni Binay mahimo’ng mohimo’g laing mga legal remedy apan dili ang pag-insistir nga may gahum pa ang TRO nga giisyu sa Appellate Court human na makapanumpa ang vice mayor isip acting mayor.

Sa gihimo sa mga Binay hayan magtuo na g’yud ang katawhan nga ang mao nga pamilya dili motahud sa balaod. Unsa na kaha no kun presidente na ang amahan niini nga si Jejomar Binay?

Angay’ng timbang-timbangon kini pag-ayo sa mga Binay kay akong tan-aw nga law-ayan ang katawhan niini ug inig-abot sa panahon nga mohukom na sila, yam-iran lang nila si Binay, ilabi na nga hangtud karon wala pa gayud niini matubag ang mga pasangil sa pangawkaw.