Misaler ang estratehiya

Siguro daghan kanato ang natingala kun unsa gayud ang bertud ni Bise Presidente Jejomar Binay gumikan sa padayon nga pag-una niini sa mga survey alang sa pagka-presidente sa piniliay sa sunod tuig.

Kini bisan pa man sa mga kontrobersiya sa corruption nga gikalambigitan ni Binay ug sa iyang pamilya. Gani gisuspenso karon ang iyang anak nga mayor sa dakbayan sa Makati sa susama nga akusasyon.

Sa naulahing survey didto sa kaulohan, nag-una gihapon si Binay sa mga posibleng mokandidato pagka-presidente sa 2016 national elections. As usual, kulang gihapon sa arangkada ang giingon nga pambato sa administrasyon nga si DILG Secretary Mar Roxas.

Labaw man tuod si Binay sa mga survey apan mikunhod usab ang iyang rating. Didto sa kaulohan, mitiurok ang iyang approval rating tungod lagi kay didto nasentro ang anomaliya sa corruption batok kaniya.

Apan sa mga probinsya ilabina dinhi sa Visayas ug Mindanao, mora’g wala natarog ang bise presidente sa mga alegasyon batok kaniya. Basi sa mga survey, padayon gihapon kuno ang dakong pagsalig sa katawhan kang Binay.

Hinuon layo pa ang sunod nga piniliay. Daghan pa ang mahitabo sa kamada sa pulitika sa nasud. Ug ato unya nga masaksihan ang grabe pa nga mga labok sa sunod nga mga bulan.

Unsay dagon ni Binay nganong wala maapektohi ang iyang imahe sa mga dakong kontrobersiya nga iyang gikalambigitan? Nganong padayon siya nga humot sa kinabag-an, ilabina sa labing ubos nga sektor sa katilingban?

Siguro usa sa hinungdan mao nga mora’g napul-an na ang kinabag-an niining mga Senate ug House investigations. Alang kanila, lisod masabtan kun unsa gayud ang padulngan niining maong mga pakisusi.

Ang nakamaro ni Binay mao nga samtang kamulo kining mga sirkus sa Senado sa imbestigasyon batok kaniya, hilom usab siyang misungasong sa kabarangayan sa mga lalawigan aron lagi mapaduol sa katawhan.

Matag banghag sa iyang mga kontra sa Senado, puwerte usab nga nakapahiyom si Binay nga nakiggakos sa mga pamilya sa mga nabiktima sa sunog, bagyo ug uban pa nga mga katalagman. Tungod niini, misaler na hinuon ang estratehiya ni Binay.