Mga benepisyo sa Neem Tree (2)

Sumpay kini sa nahaunang mga benepisyo nga gituki nato sa gisundang isyu. Ang uban pang mga benepisyo ini, maoy atong hisgutan ron sama sa;

* PAGLIMPYO SA DUGO — 'Purifier/Detoxifier' kini nga mopalimpyo sa mga hugaw o toksin sa dugo. Nga makatabang di mabara ang sirkulasyon nga mahatud ang mga nutreyens, inabagan sa 'oxygen' nga gisuplay sa neem. Tungod ini, makaayo sab sa atay, kidney, mamintin ang sirkulasyon, digesyon, respiratory ug sistima sa pagpangihi. Mokaon kag 2-3 ka linghod nga dahon, sagolan og dugos (honey), sa wa pay sud ang tiyan. Buhata ni kada adlaw sud sa pipila ka semana. Ok sad mag-'neem tea'.

* PAGKONTROL SA DIABETES —Segun sa 2000 Indian Journal of Physiology & Pharmacology, ang neem (indian lilac), makaayo ni sa pagkontrol sa 'bloodsugar' o makasanta sa diabetes. Ang duga o ang ekstrak sa dahon ini, nagbaton og mga kemikals nga magpanormal sa natural nga insulin sa lawas. Kadtong dayabetikon, mag-usap og 4-5 ka linghod o humok nga dahon, kada adlaw o laktawan og adlaw. Buhata ni nga wa pay sud ang tiyan.

* PURGA SA BITOK —Nagbaton nig ' anti-parasitic' diin ang mga toksik o mga bitok, mapurga. Mag-usap og mga dahon o moinom og 'neem tea' o magpabukal sa pinauga (di ibuwad sa adlaw) o preskong dahon. Buhata ni kaduha sa adlaw, sud sa 1-2 ka semana.

* PROBLEMA SA KUKO — Tungod sa impeksyon sa kuko sa tiil, nga nagsakit o nagbasa nga kaukalon o nadaut ang kuko, butangan lang na og neem oil.

Nota:  Ang neem di para sa mga bata o masuso, mabdos, o sa nagpasuso.