Lifestyle check sa Customs JO
Daghang bulohaton ang bag-ong molingkod nga collector sa Bureau of Customs sa Sugbo ini’g lingkod niini karong semanaha. Kini, human mibalik sa naandan niya’ng puwesto didto sa Department of Transportations and Communication si Brig. Gen. Roberto Almadin.
Mopuli kang Almadin sa BOC-Cebu ang usa ka graduwado sa PMA Matikas Class 1983 nga si Brig. Gen. Arnulfo Marcos. Usa ka maisog nga infantry man si Marcos. Sa iyang paglingkod unya angayan nga himuong “first order of battle” ni Marcos ang paglimpyo sa Customs sa Sugbo batok sa mga hao shiao nga migara na sa ilang mga puwesto sukad gipanghatagan og higayon nga gi-hire isip job order employees.
Maayo gani nga himuon diha sa BOC-Cebu ang “lifestyle check” nianang mga JO ug hao shiao sa Customs Cebu. Adunay nakasulti kanato nga adunay babaye’ng JO nga hilabihan na ka-adunahan, lupig pa ang mga regular nga miyembro sa Customs sa Sugbo. Tiaw mo na, nanghambog na nga mopalit og yuta aron tukoran og building, pagka-adunahan na lang g’yud. Unsa may gihimo sa in-charge sa training section sa BOC-Cebu nga si Jessica Delgado? Akong nahibaw-an nga ang buhatan ni Delgado ang gitahasan paghashas sa mga aplikante sa pagka-JO. Apan ngano’ng wala man ni masala sa iyang buhatan ang mga JO?
Tay’m pa ra gud, unsa man diay qualifications aning pagka-JO? Kanang makamao manguwarta? O ba kaha tan-awon ang gidugayon sa iyang pagserbisyo isip hao shiao ug ang iyang skills nga magamit sa customs? Gawas pa, kun estrikto ang pag-hire og mga empleyado sa Customs nga tan-awon og apil ang ethics, character ug attitude sa aplikante, dili ba diay kini gamiton paghashas sa JO? Mao kini ang dako’ng hagit ni Marcos paglimpyo sa job order employees sa BOC-Cebu; ug si Delgado nga maoy gitahasan sa paghashas sa listahan sa mga aplikante sa pagkonsiderar na sa “dungog” sa aplikante kun wala ba kini maapil og mga eskandalo ug pangawkaw samtang anaa sa puwesto.
* * *
Ngano’ng magsige man og pamugos si Mayor Mike Rama sa 40 kilometer per hour nga dagan sa mga sakyanan sa South Road Properties?
Mibalik na usab kining isyuha human mikalas og lima ka kinabuhi ang pagdasmag sa usa ka awto ngadto sa usa ka dakong trak sa SRP niadto’ng miagi’ng semana. Human sa aksidente, giawhag na usab ni Rama ang LTO pagpatuman sa speed limit, apan gitubag siya ni Director Arnel Tancinco nga kinahanglan kini’ng lingkoran.
Ang awto nga nadasmag gimaneho og hubog nga gikan sa party. Wala madisgrasya tungod sa overspeeding. Akong balikon, dili ang overspeeding ang isyu sa SRP, kon dili ang batasan sa motorista ang makaingon sa aksidente. Ambot ngano’ng dili g’yud makasabot si Rama niini.
- Latest
