Aw mao diay…

Akong gikasakay sa eroplano si Vic Caindec pagpauli nako dinhi sa dakbayan sa Sugbo gikan nga mibisita ko sa akong igsuon nga naospital didto sa dakbayan sa Davao.

Si Caindec mao kadto’ng gitudlo ni Mayor Michael Rama isip executive director sa City Traffic Operations Management (CITOM), apan wala danti’g dugay mi-resign.

Apil usab diay si Caindec nga nakadayeg sa malampuson nga pagpatuman ni Mayor Rodrigo Duterte sa speed limit sa mga sakyanan didto sa Davao City nga kinahanglan nga 30 kilometros lang ang gikusgon matag oras.

Tinuod, dunay mga mopakusog kun dili makakita og traffic enforcers ang mga taxi driver ug ubang motorista, apan dili kaabot og 40 KPH ang gikusgon sa ilang pagpadagan.

Ngano nga hingpit man nga napatuman ni Mayor Rodrigo Duterte ang mao nga balaud sa Davao? Tungod kini kay si Mayor Duterte dili magduha-duha sa pagpadakop ni bisan kinsa nga masakpan nga nakalapas, bisan og adunahan ka pa.

Gani ang iyang anak nga si Sarah, kadto’ng nahimo usab nga mayor sa Davao City, nasakpan sa mga traffic enforcers nga subra sa 30 KPH ang pagpadagan, gipara ug gidakop.

Kay balaud lagi, boluntaryo pa kuno nga gihatag sa anak ni Mayor Duterte ang iyang lisensya ug mao kadto ang nakapasamot sa kahadlok sa mga drayber sa Davao. Gidakop man gani ang anak ni Duterte nga kanhi mayor, ang uban pa kaha?

 Dinhi sa dakbayan sa Sugbo, gitug-anan ko ni Caindec nga adunay suod kaayo ni Mayor Rama nga giingong daghan kaayo og pinasulod nga traffic enforcer sa CITOM, iya g’yud nga gikomprontase.

Nakadungog man gud siya og mga tabi-tabi nga kini’ng mao nga mga traffic enforcers giisip nga “sacred cows” kay dili g’yud kuno matangtang bisan og makahimo’g salaod.

Kun mao kini ang sitwasyon, tukma ra usab diay ang gihimo ni Caindec nga wala magdugay sa CITOM. Ingon usab ang angay’ng himuon sa ubang opisyal sa CITOM nga kun makabantay mo nga adunay labanan ang mga opisyal bisan og nakahimo og salawayong buhat, resign mo!

Kanus-a pa man matul-id ang mga hiwi nga binuhatan sa ubang sakop sa CITOM kun adunay mga sakop niini nga “gihabolan” sa mga opisyal bisan og sila mga salawayon?

* * *

Unsa ni’ng report nga akong nadawat nga puwerte man diay ang paghasi sa sugal nga suwertres dinhi sa dakbayan? Unsa katinuod kini’ng report nga akong nadawat didto sa Davao nga ang nagpasiugda sa suwertres dinhi sa dakbayan, taga Digos, Davao del Sur?

Hisgotan nato kini sunod nato nga lindog.