Ato ni’ng sundon bi

Nakabisita ko sa Dakbayan sa Davao kay gianhi nako ang akong igsuon sa usa ka tambalanan niini’ng mao nga siyudad. Nalipay ko nga nakaanhi kay nakakuha ko og mga pagtulon-an nga angay sundon sa mga opisyal sa dakbayan sa Sugbo.

Pagsakay nako og taxi gikan sa Davao City airport paingon sa Southern Philippines Medical Center, nasayran nako sa drayber sa taxi nga akong gisakyan nga dili diay basta-basta nga ang usa ka tawo makapanigarilyo sa Davao.

Istrikto kuno kaayo si Mayor Rodrigo Duterte sa pagpadakop sa mga malapason sa balaud nga gilatid sa ordinansa sa dakbayan.

Gidid-an usab ang mga drayber sa pagpakusog pagpadagan sa ilang mga sakyanan. Hangtud lang sa 40 kilometros ang matag takna ang gikusgon nga gitugot.

Apan ang labi g’yud nga nindot nga serbisyo sa Davao City government nga nakadayeg ko pag-ayo mao ang paghatag nila og tukma nga pangalagad sa mga kabus nga pasyente.

Dinhi sa dakbayan sa Sugbo, adunay gitawag og City Medical and Hospitalization Program (CMAP) nga mao ang paghatag og tabang ngadto sa mga kabus sama sa mga tambal ug pagpa-ospital.

Sa Davao duna ‘sab sila’y gitawag og Lingap Center, apan mas epektibo ang ilang pagtabang ug dalaygon ang mga opisyal nga nagdumala.

Tiaw mo nga 24 oras nga adunay mga kawani nga moabi-abi niadto’ng mga nanginahanglan og tabang pinaagi sa pagpangayo og mga tambal?

Wala gayud kini himoa dinhi sa atong dakbayan. Dinhi sa dakbayan sa Sugbo, ang serbisyo kutob ra sa alas singko sa hapon. Sa Davao City dunay mga kawani nga gitahasan nga moserbisyo sa tanang oras.

Mapahiyumon pa gayud ang mga sakop sa Lingap Center ubos nila ni Ma’am Henrita “Nanette” Macapundag ug ni Sir Roldan “Pastor Lingap” Olave sila nga moabi-abi sa mga pasyente nga manginahanglan sa ilang tabang. Tungod diay kini kang Mayor Duterte nga mibaod gayud sa mga kawani nga ayuhon sa pagserbisyo ang manginahanglan.

Misuway ko og pag-interview sa mga pasyente nga nanginahanglan og tabang, sila’ng tanan midayeg gayud kang Mayor Duterte. Mao diay nga dili g’yud mapilde si Duterte kun molansar.

Dili ba maayo nga himuon usab kini dinhi sa dakbayan sa Sugbo? Kun ako pa ang mayor sa Sugbo, sundon nako ang dalaygon nga buhat ni Duterte nga nagpakabana gayud sa mga kabus.

Ang dakbayan sa Davao adunay 186 ka barangay nga subra pa bisan og doblehon ang kabarangayan dinhi sa dakbayan, apan naalagaran gayud nila ang ilang mga lumolupyo.

Dili ba maayo nga ato kini’ng sundon?