Nabaraw ang mga tinun-an

Gibati na karon og dili tiaw nga kahinam ang mga tinun-an sa high school o kolehiyo nga gikatakda na sa sunod nga mga adlaw sa bulan sa Marso niining tuiga ang ilang paggradwar sanglit mahingpit na man gayod nila nga maangkon ang diploma nga maoy magmatuod sa kalampusan sa ilang pagtungha.

Ang kadaghanan sa mga tinun-an nga nagtungha sa mga publikong tulunghaan nga anak sa kabus nga ginikanan  dili gayod ikalimod nga mobati og hilabihan nga kahinangop sa ilang pagbaton og diploma sa  high school  magsilbi  na man kini nga hagdanan sa pagpaningkamot. Apan di ikalimod nga dunay mga tinun-an o mga ginikanan nga mogradwar sa 4th year high school karong tuiga wa kaayo nalipay  tungod sa  K to 12 Basic Education Program nga magsugod na sa pag-epekto niining pagbukas sa tuig nga tingtungha.

Ubos sa maong programa ang mga 4th year  high school giisip pa nga mga Junior High School ug nagkinahanglan pa sila nga motungha og laing duha ka tuig alang sa Senior High School sa dili pa sila makatungha sa pagkuha og kurso sa kolehiyo.

Dili ba nga subo man kining palandungon alang sa naepektohan nga mga tinun-an nga mogradwar sa high school karong panahona? Ilabi na kun sila gikan sa kabus nga pamilya?

Ang tumong sa kagamhanan sa pagdugang og duha ka tuig sa Senior High School mao ang pag-andam daan sa mga tinun-an sa ilang pagtungha sa kolehiyo alang sa ilang pagkuha og kurso, ang Pilipinas kuno nabiyaan na sa ubang mga nasud tungod kay napulo ra ka tuig ang basic education (elementary ug high school)  niini samtang ang uban dose ka tuig una pa magkolehiyo.

Maayo ang tumong sa kagamhanan sa pagpatuman sa K to 12 Basic Education program apan ang laing subo nga palandungon tungod kay makahatag man kini og dugang kahasol sa mga tinun-an ug ginikanan.