EDITORYAL - May pagsalig pa

Samtang daghang mga Filipino ang wala matagbaw sa eksplinasyon ni Presidente Benigno Aquino III bahin sa Mamasapano encounter, apan daghan ang di gusto nga i-impeach ang pangulo tungod niini. Nagpasabot kini nga may pagsalig pa kaniya ang mga tawo.

Sa pagkatinuod, kinsa man guy tarong nga tawo ang ganahang magsige og palagpot og presidente? Kanang magsige og panawagan pagpakanaog sa presidente bisan taphaw kaayo ang rason, kadto lamang mga tawong hakog.

Dili man gud na santo ang presidente, dili lang kanang usa ka partikular nga butang ang iyang responsibilidad kun dili, ang tibuok nasud. Dili lang police operations, military operations ang trabaho sa presidente, labaw nang wala siyay training para niana.

Tinuod dunay kapalpakan ang presidente sa maong operasyon kun ang basehan ang imbestigasyon nga gihimo sa Senador ug sa Board of Inquiry sa PNP, apan paigo ba kini aron guboton ang malinawong pagpuyo sa usa ka milyon ka Filipino?

Sa una pa lang niyang pamahayag human sa insidente (bisan uwahi na) daan nang giako sa presidente ang responsibilidad kun nganong nahitabo kadto. Apan ang iyang mga kritiko gusto pa g’yud pahilakon o paludhon si Aquino kay siguro gihambogan lang sila kaniya.

Gusto siguro nilang moatubang si PNoy sa telebisyon sama sa gibuhat ni kanhi presidente ug karon  Pampanga Rep. Gloria Macapagal Arroyo nga miingon “I am sorry” bahin sa “Hello Garci” tape.

Lahi kadto nga kaso, dili pagpanikas sa eleksyon ang kaso sa Mamasapano diin 44 ka polis ang nakalas ug kapin sa 20 ka mga rebelde ug sibilyan ang nakalas. Ani nga insidente maayo ang intensyon sa presidente apan sayop lang sa paagi. Apan di paigong basehan aron guboton ang Pilipinas.