Pasalamat

Magpalahi usa ta karon kay akong hatagan og pagtagad ang e-mail nga akong nadawat gikan ni Edgar Espina, presidente sa Mandaue City Public School Teacher’s Association nga nagpasalamat sa libre’ng serbisyo nga miabot sa 27 ka barangay sa Mandaue, ug nakabenepisyo niini ang gibana-bana 1,000 ka tinun-an sa 47 ka public schools. Ania ang iyang suwat.

* * *

Dako nako’ng garbo nga sa labing una’ng higayon aduna’y grupo nga mitabang sa mga bata ug mga magtutudlo paghatag og libre’ng serbisyo sa tanang publiko’ng tunghaan sa Mandaue. Ang Federated Parents Teacher’s Association sa Mandaue City mihimo’g medical, dental ug optical mission kaniadto’ng Marso 14 didto sa Mandaue City Central School.

Usa ka libo ka tinun-an sa elementarya ug high school ug mga magtutudlo ang nakabenepisyo sa libre’ng serbisyo sama sa konsulta medical ug tambal, pag-ibot sa ngipon, pagpanghatag og mga eye glasses, pan ug kape, feeding program ug libre’ng papsmear ug breast screening para sa mga magtutudlo ug ginikanan.

Ang GMA Kapuso Foundation maoy nag-una sa mga sponsors sa maong kalihukan inabagan sa Eduardo J. Aboitiz Cancer Center, Juanito King Foundation, Eye Lounge, Julies Bakeshop ug Rep. Luigi Quisumbing. Daghang bata, ginikanan ug mga magtutudlo ang nagpasalamat kay dako kaayo’g gikatabang ang gipasiugdahan’g kalihukan sa Federated PTA, ilabi na niadto’ng wala’y ikagasto pagpahiling sa doktor kay sagad sa mga gipili’ng beneficiaries kadto g’yud nga mga tinun-an nga ang mga ginikanan walay ikagasto.

Isip presidente sa mga public teachers diri sa Mandaue, mapasalamaton kaayo ko kay naapil usab ang ubang magtutudlo sa mga beneficiaries kay dako na kini’g tabang kanila. Gani duna’y panahon nga maguol ko nga makadawat og suwat gikan sa maestra o maestro nga mangayo’g hinabang kay igasto sa pagpatambal kun sila masakit kay pila ra man ang among suweldo.

Nindot unta kaayo nga himuon kini mata’g tuig kay aron kadto’ng wala maapil karong tuiga sa mga beneficiaries, kahatagan usab og higayon sa sunod.

Kini’ng gigasto sa Federated PTA sa mao nga kalihukan gikan kadto sa pundo nga natigom sa gihimo nila’ng "Run & Zumba" kaniadto’ng Desiyembre pinaagi usab sa pag-abag sa DepEd-Mandaue City Division ubos ni Dr. Virginia Zapanta, ang schools division superintendent ug mga supervisors.

Giapilan usab kini sa mga magtutudlo ug mga ginikanan sa mga tinun-an sa mga public schools sa Mandaue City.

Mga pasalamat ngadto sa mga volunteer doctors gikan sa Visayas Community Medical Center, General PTA officials, ni Dr. Rina Menchavez Seares ug labaw sa tanan sa presidente sa Federated PTA.

Congratulations sa malampuson ninyo’ng kalihukan. Daghang salamat!  Mamahimo ninyong itext sa 09062973166