Kun mo-resign si PNoy

Makaangkon na ba gud og hustisya ang nangamatay nga mga SAF Commandos kun mo-resign sa katungdanan si Presidente Aquino? Unsa kaha ang mahitabo human sa iyang pag-resign?

Kusog kaayo karon ang pressure sa media ug sa mga kaatbang ni Presidente Aquino pagpa-resign kaniya sa katungdanan. Ang panawagan gihimo bisan og wala kini suporta sa kinabag-ang molupyo sa nasud.

Mahupay na ba ang dughan sa nagbangotan nga mga kabanay sa mga biktima sa massacre?

Unya, kinsa man ang ilang ipuli kun mo-resign si PNoy? Sa balaud, si Vice President Binay g’yud. Apan, mura man og dili ‘sab sila gusto ni Binay. Maoy ilang tinguha nga sila ang mopuli. Kinsa man ni sila?

Akong nadunggan nga sila mao si kanhi Senador Kit Tatad, ang akong kanhi amo sa Department of Public Information; kanhi Chief Justice Corona; uyoan ni Noynoy nga si Jose Peping Cojuangco ug ubang mga kaanib ni kanhi Presidente Gloria Arroyo.

Mao kuno kini sila ang gilauman nga motarong sa pagdumala sa panggobiyerno sa atong nasud. Ug lagmit maoy mopitol sa pangurakot sa gobiyerno.

Kun ako pay Noynoy, mo-resign ko, kun mao g’yud ni ang gusto sa katawhan ug dili sa pipila lang ka radio commentators, newspaper columnists, gamay’ng pudyot sa opposition ug pipila ka Obispo.

Ilang gisuwayan ang people power … wala man mokubit ang katawhan. Nagpadayon ang mga protesta, mao gihapon, dinhi sa Sugbo, mingaw man.

Nagpasabot kini nga bisan kun atong gipasanginlan si Noynoy, being the commander-in-chief, nga aduna siya’y tulobagon sa pagkamatay sa 44 ka sakop sa SAF, dili kini mo-warrant pagpalagpot kaniya.

Busa, 14 na lang ka buwan, manaug na si Noynoy gikan sa Malacanang. Ato na lang ni’ng huwaton.

Ug kini’ng grupo nila’ng Tatad, kini’ng gitawag nga (unsa to nga Council?), mahimo nga mo-field usab og ilang mga kandidato, labi na pagka-Presidente, aron masuta kun aduna ba sila’y support sa katawhan.

Giingon nga magmalampuson lang ang people power kun ma-usa ang military ug ang Simbahan, sumaa sa atong nasinati sa unang people power, diin nag-front line gyud si Cardinal Sin.

Karon, pipila lang ka Obispo ang nagsabasaba. Ang Catholic Bishops Conference of the Philippines (CBCP) wala man mo-demanda pagpa-resign ni President Aqunio. Ingon man, ang military wala may kisaw.

Anyway, bisa’g giunsa pagpaningkamot sa media pagpadaku sa resignation issue batok ni PNoy, wala man mokihol ang katawhan, gawas sa mga tigpamaba ni Vice President Binay.

Sa ako na’ng giingon, maghuwat na lang gud ta sa eleksyon sunod tuig.