Gitraydor ang kagamhanan?

Kun tinuod man ugaling kining mga alegasyon ni Senador Peter Alan Cayetano nga nagpakusog karon sa puwersa niini ang Moro Islamic Liberation Front, nan dako gayud ang problema sa atong kagamhanan pagsulbad sa suliran didto sa Mindanao.

Dakong pangutana nganong grabe ang expansion karon sa rebeldeng MILF niining panahon nga kamulo kini sa pagpakigsabot sa gobiyerno alang sa giumol nga Bangsamoro Basic        Law.

Nagpasabot ba kini nga gitraydor sa maong grupo ang atong kagamhanan? Ug nga dili tinud-anay ang pagpakigsabot niini sa administrasyong Aquino alang sa kalinaw didto sa Mindanao?

Matud ni Cayetano sa iyang privilege speech sa hawanan sa Senado sa niaging semana, kamulong nagtukod ang MILF og mga kampo sa ubang mga lugar didto sa Mindanao aron pagpadako pa sa ilang teritoryo.

Mibutyag usab ang senador nga kamulo karon ang pagpamalit og mga high-powered firearms ang maong rebelde nga grupo. Unsay ipasabot niini sa MILF? Nga busy sila karon sa ilang mass recruitment sa ubang Muslim didto sa Mindanao?

Apan ang labing kuyaw niini, matud pa ni Cayetano, mao ang dakong posibilidad nga makigkaalyado ang MILF sa ubang mga rebeldeng grupo didto sa Mindanao sama sa grupo ni Kumander Umbra Kato, Abu Sayyaf ug uban pa.

Adunay mga litrato ang Senador sa giingong ilegal nga kalihokan sa MILF. Ug kun tinuod kining maong mga ebidensiya, dili kini maayo nga tilimad-on alang sa paningkamot alang sa kalinaw sa Mindanao.

Kun tinuod man ugaling kining maong gipabuhagay ni Cayetano, sama ra nga giluto ang kagamhanan sa kaugalingon niini nga mantika. Kun tinuod kini, nan makaingon kita nga useless lamang kining mga peace talks.

Unsa ba gayud ka sinsero ang MILF sa negosasyon niini sa kagamhanan? Ambot lamang. Apan kun atong basihan ang panghitabo sa nakalabay nga mga semana, lisod tuohan ang sinsiredad niining maong grupo.

Sa ako nang giingon kaniadto, kun gusto gayud og kalinaw ang mga rebeldeng Muslim didto sa Mindanao, nganong dili man lamang sila magkahiusa ug motahan ngadto sa kagamhanan alang sa negosasyon alang sa ilang otonomiya?

Hangtud nga dili kini buhaton sa atong kaigsuonang mga Muslim, wala koy nakitang kalinaw nga mosakdap sa Mindanao.