EDITORYAL - Chain of command

Nalapas ni Presidente Benigno Aquino III ang chain of command sa nahitabong trahedya sa PNP-Action Force didto sa Mamasapano, Maguindanao nga miresulta sa kamatayon sa 44 ka mga polis.

Kini maoy nakita sa resulta sa Board of Inquiry (BOI) nga gihimo sa PNP. Ang pag-apil ni Aquino kang kanhi PNP Director General Alan Purisima sa pagplano ug sa aktwal nga pagpahigayon na sa Oplan Exodus maoy gibasol kun nganong naputol ang kutay sa mando gikan sa taas padung sa kinaubsan ilabi na ag koordinasyon.

Suspendido na man si Purisima sa pwesto nianang Enero 25, busa wala na unta g’yud siya’y labot sa maong operasyon. Apan tungod sa kasuod nilang duha ni Aquino giapil siya sa pagplano sa maong operasyon.

Ang panaghigalaay sa duha nagsugod pa panahon sa Edsa Revolution hangtud na sa pagkahimo nang presidente ni Aquino. Usa pa niini, si Purisima maoy usa sa mga nagplano dihang unang nahimugso ang pagdakop sa Malaysian terrorist nga si Zulkifli bin Hir alyas Marwan.

Siguro lahi ra ang resulta kun wala pa mag apil-apil si Purisima ug kun gisunod lang ang chain of command. Posibleng wala ma-neutralized si Marwan ug walay nakalas nga polis ug sa Moro Islamic Liberation Front (MILF).

Kining bag-ong kalamboan dunay dakong epekto sa umaabot nga kampanya sa administrasyon ug sa mga kaalyado niini sa umaabot nga piniliay.

Apan kinahanglang dili nila mawala ang pokus alang sa pagkab-ot sa kalinaw ug pagpalambo sa Mindanao.  Mas nagkinahanglan karon ang mga Filipino sa mga magbabalaod nga tarungon ang pag -review sa Bangsamoro Basic Law nga mokomporme sa tanan.