King of the road

Ang mga motorcyclist, tinuod g’yud nga hari sa kadalanan. Tinuod tungod kay lakip ang gobiyerno sa Republic of the Philippines, helpless, wala’y mahimo batok sa ilang pag-abuso ug pagsupak sa balaud.

Duna kita’y anti-noise ordinance, ug may national law usab niini. Mibuhat usab ang gobiyerno og balaud sa pagpagamit og crash helmet.

Sa ubang dapit sa nasud, adunay ordinansa nga gidid-an ang pag-angkas, gawas sa kabanay sa nagmaneho sa motorsiklo. Gidid-an usab ang pagpaangkas sa kabataan.

Ang overspeeding supak usab kini sa balaud sa trapiko. Kini’ng tanan, hari’ng lungsod, gipakabaliwala lang sa mga motorcyclists.

Mao kini ang giingon sa usa ka foreign journalist nga ang mga balaud sa Pilipinas, “are mere suggestions,” mga sugyot lang, busa, mahimo’ng dili tumanon.

Ang kasaba sa mga motorsiklo maoy mopukaw kanimo sa tunga’ng gabii ug sa kaadlawon. Sa mga takna nga tingpahulay, baldahon ka sa kasaba niini, ug kun helpless ang gobiyerno batok niini, unsa may mahimo nato’ng mga yano’ng lungsoranon? Pastilan!

Ug aniay maayo’ng sundon nato dinhi sa atong dakbayan. Sa Quezon City, ang mga  barangay watchmen, gihatagan og gahum pag-issue og Ordinance Violation Receipts (OVRs) ngadto sa mga traffic violators.

Ang Barangay Traffic Enforcement Ordinance mi-require sa 142 ka barangay pagtudlo hangtud sa napulo (10) ka Barangay Public Safety Officers (BPSO) isip mga traffic enforcers.

Apan ang appointment dili automatic. Kinahanglan nga motapus una sila sa Traffic Enforcer Training Program, ug mopasar sa examination nga ihatag sa Department of Public Order & Safety.

Kun buhaton kini sa tanang dakbayan sa tibuok nasud, daku kini’g ikatabang pagsulbad sa suliran sa trapiko, sama dinhi sa atong siyudad nga wala kita’y nakita’ng kasulbaran niini.

Atong makita nga daw wala’y mahimo, helpless, ang atong mga tinugyanan sa trapiko.

Ambot kun miagi ba ni sila og traffic management seminar, o gidiritso la’g tudlo.

Kinahanglan ni og formal nga pagtuon uy. Sa ubang mga nasud, duna g’yuy formal schooling ang mga traffic enforcers, una sila magwarawara sa kadalanan. Ug normally, wala’y labot ang politika sa pagtudlo sa mga enforcers.

Of course, ang pagkawala nato’y disiplina, ang nakapasamot sa problema sa trapiko. Apan, unsaon man tuod nato pag-disiplina sa mga driver nga lax ug lenient man kaayo ang enforcement.

Madala man lang og sabut-sabot ug maglingiw-lingiw man lang, kun mahalon nga kotse ang mag-park sa no-parking nga luna.

Kun estrikto ang pagpatuman, mapugos ang mga driver pag-discipline sa ilang kaugalingon. Di ba?