Chairman, Bayan-Central Visayas

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Tubag sa lindog nga Arangkada ni Leo Lastimosa “Nihungaw nga mga protesta” nga migawas sa Banat News - February 28, 2015

 Dili tinuod nga hilom ug tak-om ang Bagong Alyansang Makabayan sa isyu sa kurapsiyon ni Bise Presidente Binay. Ang Bayan nagpagawas og mga posisyon nga kinahanglang tubagon ang mga aligasyon sa kurapsiyon batok sa bise presidente.

Sa mga protesta sa BAYAN, apil sa panawagan niini ang  “ Lahat na sangkot dapat managot.” Pagtaral sa mga nahilambigit sa pangurakot, apil na niini ang mga suod ni Presidente Aquino.

Apil ang Bayan-Central Visayas sa nagduda sa motibo sa imbistigasyon sa senado bahin sa aligasyong kurapsiyon ni Bise Presidente Binay, diin giingon nga pinakataas nga imbestigasyon nga miabot na kini og 14 ka hearing kun ang tinguha sa senado in aid of   legislation.

Samtang ang imbestigasyon sa Mamasapano encounter sa ubos balay-balaoranan gipugngan ug gusto’ng undangon. Klaro ang posisyon sa Bayan sa panawagang pagpa-resign ni Presidente Noynoy Aquino, gikan sa palpak nga operation sa Mamasapano encounter, Luneta hostage ug Zamboanga siege,  palpak sa pagtubag sa demanda sa mga survivors sa bagyo’ng Yolanda.

Palpak sa pagsulbad  sa kakabus ug daghang gipanggutom, padayon ang pork barrel system ug pagdupa ni PNoy sa iyang mga alyado nga nahilambigit sa pork barrel scam.

Kini ang bug-at nga hinungdan ngano’ng nanawagan ang Bayan sa pagpa-resign kang Pres. Aquino.  Ang  People’s Transition Council maoy temporaryo’ng  ipuli kun mopahawa si Pres. Noynoy pinaagi sa people power.

Modumala kini gikan sa usa ngadto sa duha ka tuig sa atong gobiyerno. Dili iapil  sa Peoples Council ang mga traditional nga politiko ug mga dagko’ng negosyante.

Ang Peoples Council kuhaon gikan sa mga  individual ug mga sector / hut-ong nga nakigbisog sa pagpalagpot ni Pres. Aquino.

Trabaho sa Peoples Council:

• Tukoron ang independente’ng komisyon nga moimbestigar ug motaral sa sad-an sa trahedya sa Mamasapano.

• Limpyohan ang Comelec, wagtangon ang political dynasty ug patronage politics.

• Wagtangon ang pork barrel system, taralon ug silotan ang nahilambigit sa PDAF ug DAP.

• Ipatuman ang  ekonomikanhong programa nga mosulbad sa kakabus.

• Wagtangon ang  VFA, MLSA ug EDCA.

• Pagpadayon sa negosasyon sa kalinaw sa MILF ug NDF. 

Dili usab tinuod ang  giingon sa kapolisan nga 100 ra ang nisalmot sa martsa rally sa Bayan niadto’ng February 25. Sa ihap sa Bayan 300 ang nisalmot.