Sunda ninyo si Kap Miranda

Kun ang mga kapitan sa barangay molihok lang g’yud, sigurado nga mohapsay ang tagsa-tagsa nila ka barangay apan kun pagdawat ra’s honoraryom ang anaa sa ilang utok, gubot pa’s lukot ang ilang mga dapit.

Naabtan nako si Barangay Kapitan Lediore “Boy” Miranda sa Barangay San Roque, Dakbayan sa Sugbo, nga nakigtigum sa mga tindera daplin sa karsada nga sakop sa iyang barangay ug gipahimangnoan nga dili sila moabuso.

Ang pag-abuso nga gipasabot ni Kapitan Miranda mao kanang moanam-anam sila pagsibog ngadto sa karsada. Una, himoan nila og tapangko ang ilang tindahan. Sunod, ang tapangko ila na nga tabil-tabilan.

Kun dili g’yud sila badlongon, ang tabil-tabil himuon na g’yud nga bungbong ug miukopar na sila sa aseras. Mao kini ang problema karon nga mugna sa pagkatanga sa ubang mga kapitan ug utro pa ang mga sakop sa Probe Team.

Husto kaayo ang gihimo ni Kapitan Miranda nga mentras mao pa’y pagsugod, badlongon dayon. Ang nakadaot gud niini’ng ubang kapitan kay mahadlok mobadlong kay naghuna-huna man sila nga basin ang mao nga mga tawo dili na unya mobotar nila.

Aw, sudla ra gud ninyo ang mga dapit diha sa Barangay Pasil, Barangay Suba, Capitol Site, Kalunasan, Ermita, Day-as, T. Padilla ug daghan pa nga mga barangay.

Kun husto pa ang inyong panghuna-huna sigurado ko nga makakita dayon kamo sa angay’ng usbonon.

Si Kapitan Miranda gikiha kini sa miagi’ng tuig kay gibadlong niya ang nagtaud og tapangko nga anaa na sa aseras ug makabalda na sa pag-agi sa mga tawo.

Alang kanako, angay’ng daygon si Miranda kay gipakita niya ang tinuoray’ng serbisyo. Tinuod, dunay masuko kun estrikto nimo nga ipatuman ang balaod, apan mas labing daghan ang malipay.

Asa man ang imong palabihon?

* * *

Gisaway pag-ayo ni Kapitan Miranda si Raquel Arce, ang pangulo sa City Hall demolition team. Unsaon, nga gipapahawa ni Arce ang mga pamilya nga nagbarung-barong daplin sa sapa sa Palma Street, sakop sa Barangay San Roque.

Apan ang mga tawo didto niya gipaestar sa dapit nga tukoranan og mga balay sa mga “qualified beneficiaries” sa mga biktima sa sunog sa mao nga dapit. Resulta, bisan og andam na unta ang proyekto nga mapatukod sa gasto mismo sa mga beneficiaries apan wala pa gihapon kasugdi kay duna may nagpuyo sa luna nga tukoranan og balay.

Wala masayop si Kapitan Miranda sa pagsaway ni Raquel kay tinonto man ‘sab na’ng iya’ng gihimo. Tan-awa, nalangan na lang hinuon ang pagtukod sa proyekto.