Pagsaulog

Motuo ba kamo nga si kanhi Special Action Force commander Getulio Napeñas nagbinuang kang Pres. Noynoy Aquino sa pagpahibalo niini sa sitwasyon sa Mamasapano nga mikalas og 44 ka SAF commandos? Mitumaw kining maong kuwestiyon human ang presidente nanghunaw na usab sa direktang tulobagon sa mga sayop sa operasyon sa Mamasapano ug subling mitudlo kang Napeñas sa mga kasaypanan. Senyal kini nga dili gyud moangkon ang presidente sa iyang sayop bisan na-establisar na nga direkta niyang gipasuperbisar ang si kanhi PNP chief Alan Purisima sa Oplan Exodus bisan suspendido kini sa Ombudsman.

Dili kita makapugos kang Noynoy sa pagkaon sa atong pagtuo nga “ang usa ka maayong lider makamao modawat og kasaypanan ug makamao mangayo og pasaylo sa kasaypanang nahimo.” Dili man unta kita perpekto. Kitang tanan masayop, apan gawas nga kusog mamasangil og laing tawo atong presidente, padayon kining magpakaaron-ingnong “dili masayop.” Nagparehas lang si Noynoy ug ang iyang bise presidente nga si Jejomar Binay. Kun si Noynoy kusog mamasangil og laing tawo ug dili moangkon og kasaypanan, si Binay gustong ipasangil ang Mamasapano encounter nga mikalas og daghang kinabuhi sa mga polis, mga rebeldeng Muslim ug mga sibilyan ngadto sa tawong walay labot – si DILG Sec. Mar Roxas.

Misulay og kaduha ang anak sa bise presidente nga si Sen. Nancy Binay pagbitik kang Roxas, Defense Sec. Voltaire Gazmin ug AFP Chief of Staff Pio Catapang pinaagi sa pagpangutana atol sa Senate inquiry kinsa kanila ang tighatagan og update kang Noynoy sa panghitabo sa Mamasapano. Apan wala kini molampos.

Wala makaagwanta si Bise Presidente Binay. Niadtong miaging semana mitingog na gyud kini pinaagi sa pag-ingon nga aduna gihapoy tulobagon si Roxas sa engkuwentro sa Mamasapano, kini bisan pa man walay kukahadlok ang kalihim sa DILG pagsumiter sa tanan niyang text messages ngadto sa presidente ug sa AFP chief of staff ug sa mga tubag niini.Makasabot hinuon kita ni Binay nganong gusto gyud niyang maduot sa imbestigasyon sa Mamasapano si Roxas. Naguba na ang iyang popularidad taliwala sa mga pasangil nga giatubang sa iyang pamilya nga hangtod karon wala atubanga. Nahadlok kini nga sa pagkatikyaob niya sa survey, ang mabulahan si Roxas.

Maayo na lang gani wala molampos ang dautang laraw ni Binay batok kang Roxas. Wala mopaak sa isyu ang media nga nakakita sa gihimo ni Binay nga pamolitika ra aron madaot si Roxas kinsa maoy klaro nga kasakbang niya sa 2016 presidential election. Nagpares si Noynoy ug Binay. Mga klase sila sa tawo nga kusog mamasangil aron luwason ilang mga nawong.