EDITORYAL – Fixers wa masumpo

Dalaygon ang gihimo sa National Bureau of Investigation (NBI) nga gidakop nila ang usa ka fixer nga nag-operate diha sa ilang compound nga daghan na kaayo og nabiktima nga gibulsa ra ang gibayad kaniya.

Wala paabota sa mga NBI agents nga modagsang pag-ayo ang mga fixers nga nag-operate sa ilang compound. Ang pagdakop sa NBI sa mao nga fixer naghatag kini og warning sa ubang fixers nga mohunong na.

Apan diha sa regional office sa Land Transportation Office (LTO) wala gihapon mahunong ang mga fixers. Dili hinuon sila makalihok sa pagkuha og driver’s license kay maayo man ang sistema nga gipatuman, apan anaa sila sa mga lukatonon nga lisensya sa drayber nga nadakpan.

Tinuod, dunay mga karatula nga nagpahibalo nga wala tuguti ang mga fixers pag-operate diha sa LTO compound apan duna man lang gihapo’y mga pinalabi nga makalusot. Gani ang ubang fixers makita man nga anha magyampungad kilid g’yud sa opisina sa operations branch.

Mao kini ang dako’ng hagit ngadto kang LTO-7 Regional Director Arnel Tancinco nga tinud-on g’yud niya sa pagpatuman ang pagdili sa mga fixers aron hapsay ang pagtrabaho sa mga kawani.

Didto sa Talisay City bisan daghan ang mga motorista ug mga drayber nga mopabag-o sa ilang rehestro sa sakyanan ug molukat og lisensya apan wala’y samok kay wala may fixers. Apan kun wala’y fixers sa Talisay, gikataho nga daghan usab kaayo ang nag-operate diha sa LTO-Mandaue City ug sa uban pa nga mga district offices. Ngano nga dili man gayud kini mahunong?

Usahay makapaduda nga posible’ng bahinan tingali ang mga opisyal sa LTO sa makita sa mga fixers kay ngano’ng dili man nila badlongon?