Anak nakabangga, kinsa’y makabayad?

Dear Atty. Divine,

Duna ko’y pangutana bahin sa akong 15-anyos nga manghud nga nakabangga og usa ka tiguwang sa diha’ng iyang gikuha ug gimaneho ang motorsiklo nga wa’y pananghid. Ang iyang gibanggaan gidala sa hospital  ug gisemento ang kamot. Karon gusto’ng magpa-refund sa akong mga ginikanan ang pamilya sa biktima sa ilang nagasto. Mibahad sila nga ikiha ang among mga ginikanan kun dili sila mobayad. Ang akong pangutana makiha ba ang akong mga ginikanan? Unsa may maayo’ng buhaton nga wa man say ikabayad ang akong mga ginikanan? Maayo unta og imo mi nga magiyahan sa among angayan nga buhaton. -Josie

Dear Josie,

Ubos sa atong balaod, kun ang usa ka menor de edad makahimo og kadaut o damages, ang mga ginikanan maoy mosagubang sa civil liability niini. Sama sa nahitabo sa imong manghud nga nakabangga, then ang mobayad sa gastohan sa biktima mao ang imong mga ginikanan ug mahimo sila nga pasakaan og kaso’ng civil kun dili sila mobayad. Ang maayo ninyo nga buhaton karon mao ang pagpakigsabot sa pamilya sa biktima nga inyo lang hinay-hinayan sa pagbayad ang ilang nagasto ug pasabton lang ninyo nga mismo ang imong mga ginikanan apiki ‘sab tawon sa kuwarta. Mas maayo nga inyo na lang sabut-sabotan aron dili kamo mangabot  pa sa korte. - Atty. Divine