Brgy Catarman, Cordova, Cebu
Maayo unta og ang mga reklamo nga ania napatik dinhi hatagan dayon og pagtagad sa mga hingtungdang opisyal.
“Naa na man unta’y ordinansa diri sa among lugar nga kutob na lang sa alas 10 sa gabii ang mga enternetan pero wala man matuman kay magbinuntagay man gihapon. Mga ginikanan mahasol kay ang ilang anak sige’g duwa.”
Brgy Pardo, Cebu City
“Sa highway g’yud tungod sa skywalk adunay lungag dako ug lawom kaayo. Daghang motor nadisgrasya diha nangaotso ang yantas ug usa na ako sa nabiktima. Maayo unta’g maatiman na’ng problemaha.”
Brgy Mabini, Cebu City
“Hangyo lang unta mi nga mabadlong ni’ng computeran duol sa sports complex ug eskwelahan sa day care kay daghang bata maamong kay usahay moapil og duwa, dili mosulod sa klase.”
Brgy Cantumog, Carmen, Cebu
“Naunsa na man ning among karsada dagko na man kaayo’g libaong ug puwerte na nga gubaa. Igo ra man giabunohan og anapog ang libaong. Mura’g way pulos ang abuno kay ang motorista molikay man gihapon sa giabunohan kay lawom man gihapon.”
Brgy Umapad, Mandaue City
“Hangyo lang unta mi nga ipatangtang kana’ng tarpaulin sa skywalk duol sa eskwelahan kay dili na man makita ang moagi sa taas basin binuangan ang mga bata kay anaay mag-estambay diha pirmi nga lalaki sige’g pangamay sa mga bata.”
Brgy Cogon, City Of Naga
“Patabang unta mi diri kay among karsada paingon sa Ka-Lopez, saylo diri sa among barangay hall, guba kaayo ug delikado sa mga magmotor. Wala man g’yud ni siguroa’g paayo aron unta walay madisgrasya.
Brgy Masaba, Danao City
“Naunsa na man ning among lugar nga wala man g’yud nahimo’ng kaayuhan ang among mga opisyal kay wala kaatiman sa problema sa napundo nga tubig. Itom na kaayo unya wala ‘sab sila kapaayo sa basketball court para unta malingaw ang mga bata sa duwa ug dili sa bisyo.”
Brgy Calajoan, Minglanilla, Cebu
“Wala man g’yuy nakaatiman sa ihawan diri uy. Human gamit pasagdan ra man ang ilang mga biya nga balahibo ug uban pa daghang ulod unya usahay kuyawan mi kay ang ilang gamiton nga gatong kay guba nga ligid, baho kaayo.”
Brgy Tisa, Cebu City
“Manawagan mi sa mga kawani sa among barangay nga unta ilang ayuhon pagpanguha ang mga basura kay diri sa among dapit dili man atimanon ang pagkuha. Naa ra ba mi bakery, kinahanglan g’yud unta makuha dayon ang basura kay lain kaayo tan-awon "
- Latest
