EDITORYAL – Fire Prevention Month

Karong buwana , Marso, gideklarar ni kanhi presidente Ferdinand E. Marcos niadtong Nobiyembre 17,1966 ang Presidential Proclamation No. 115-A isip buwan sa pag-obserbar sa Fire Prevention Month. Una kining giimplimentar pagkasunod na nga tuig sa bulan sa Marso.

Matag bulan sa Marso mopahigayon ang Bureau of Fire Protection og nagkalain-laing mga kalihokan pag-edukar sa publiko aron malikay sa sunog.

Daghang mga sarkastikong mga tawo nga manaway sa kabomberohan kay nganong ang buwan sa Marso gideklarar man nga Fire Prevention Month bisan daghan ang mga insidente sa sunog.

Kaniadto pa hangtud karon, sa bulan sa Marso  mabatyagan ang ting-init ug tungod niini dali kaayo nga mosilaob ang mga butang.

Ang pagmatngon sa paglikay sa sunog, dili trabaho sa kabomberohan, kondili iya sa katawhan nga nagpasagad sa ilang kaakohan.

Ang mga bombero inabagan sa mga local nga kagamhanan maoy mo-edukar sa mga komunidad kun unsa ang mga pamaagi paglikay sa sunog.

Apan gikan niadtong 1967 hangtud karon, daghan gihapong mga tawo ang wa magpakabana, busa daghan gihapon ang nangabiktima sa sunog.

Milyones nga kantidad sa kabtangan ug propiyedad ang naabo gumikan sa pagpasagad ug way pagpakabana.

Bisan wala ipadayag sa publiko ang pagmahay tungod sa kakulangon sa kabomberohan, klaro kaayo nga nagkinahanglan sila og tabang gikan sa mga local government units pinaagi sa pagpalit og dugang mga gamit nga di mahatag sa nasudnong kagamhanan.

Angay hinumdoman sa tanan ang panultihon sukad pa kaniadto nga “mas maayo pang lunopan nungka masunogan.” Gumikan kay sa sunog, wa nay mapudyot nga gamit.