Nabutaan ni Purisima
Human sa daghan uyamot nga mga hikuhiko sa kadagkoan sa militar ug kapolisan ug sa mas daghang pamostura sa mga sakop sa Kongreso nga nagduma sa imbestigasyon sa engkuwentro sa Mamasapano, Maguindanao, nitumaw nang mga ebidensiya sa kadako sa papel nga gihuptan ni Direktor Heneral Alan Purisima, ang ni-resign nga hepe sa PNP:
Siya’y nagmaniobra nga mabutaan sa Operation Exodus silang DILG Secretary Mar Roxas, PNP Chief Leonardo Espina ug AFP Chief Gregorio Catapang; ug
siya’y naghatag ni Presidente Noynoy Aquino og sayop nga kasayuran sa gidangatan sa SAF commandos ug sa napakyas nga mga paningkamot paggamit dayon sa mga kanyon ug tangkeng iggugubat sa militar.
* * *
Nabisto nga dako diay’ng bakak ang nahaunang pangangkon nilang Aquino ug Purisima nga igo lang nitabang si Purisima pinaagi sa paghatag og kasayuran mahitungod nilang Zulkifli bin Hir alyas Marwan ug Basit Usman. Niinsistir pa gani si Purisima nga gitugyan na niyang pagduma sa operasyon ngadto ni SAF Chief Getulio Napeñas sa wa pa siya masuspenso sugod niadtong Disyembre 4.
Nisamot kabantang ang pamakak ni Purisima tungod sa bag-ong kasayuran nga gihatag ni Napeñas dihang gisukitsukit siyang Senate President Franklin Drilon niadtong Lunes: Si Purisima ang nihatag niya og go signal, di tambag lang, pinaagi sa text message niadtong Enero 13 sa paglusad sa operasyon niadtong Enero 25.
* * *
Si Purisima ang ni-text sa mosunod nga kasayuran nga posibleng nakahatag ni Aquino sa sayop nga pagtuo nga hingpit nga nilampos ang operasyon:
Una niyang text sa alas-5:45 sa buntag nagpahibawo sa presidente nga napatay si Marwan apan nasamdan ang usa ka SAF commando;
Ikaduha niyang text nagpahibawo nga gikapinusilay sa SAF ang 15-20 ka armadong mga tawo maong wa nila makuha si Usman;
Ikatulo niyang text, nga wa mokurihir sa pagtuo ni Aquino nga 160 ka SAF ang apil sa operasyon, nangangkon nga duna na sila’y mechanized ug artillery support sa militar; ug
Hangtod sa iyang text sa alas-11:38 sa buntag, kanus-a nangamatay nang kasagaran sa SAF commandos, nipasalig pa si Purisima nga subli silang mo-atake pagkuha ni Usman.
* * *
Atubangan sa tanang bulilyaso ni Purisima, lisod sabton nganong si Napeñas gihapon ang gihan-okan sa tanang tulisok ni Aquino. Nagpakabuta ba siya sa kahigayonan nga wa matuman ni Napeñas ang iyang mga sugo tungod sa sukwahi nga mga sugo ni Purisima?
Gipakaingon nako nga sa kataposan nakaamgo nang presidente nga gibudhian ni Purisima ang ilang kasuod maong gipa-resign na gyod sa pagka hepe sa PNP. Posible bang napugos lang si Aquino pagpa-goryo-goryo kay ang pag-ila sa tanang kasaypanan ni Purisima mao ang pag-angkon nga sayop ang iyang pagtugyan sa mahinungdanong misyon ngadto sa opisyal nga gidid-an na sa balaod pagpabilin sa katungdanan?
- Latest
