Sukli

Aduna kita’y balaud nga manalipod kanato’ng mga mamalitay gikan sa mga pag-abuso sa mga negosyante, labi na sa mga dagko’ng mall.

Ang Republic Act 7394, kon Consumers Act of the Philippines, namugna 22 ka tuig na ang milabay. Ambot duna bay nakasohan o nasilotan sa pagsupak niini.

Matud pa, “An act or practice shall be deemed unfair and unconscionable whenever the producer, manufacturer, distributor, supplier or seller, by taking advantage of the environment or surroundings, induces the consumer or gross one-side in favor of the producer, manufacturer, distributor, supplier or seller.”

Sa ato pa, mailad, malupigan, maalkanse ang mga consumer, ug mapaboran ang mga manufacturer, distributor, ug mga naninda, supak ni sa balaud.

Si Rep. Sherwin Gatchalian sa Valenzuela City mipasaka’g balaudnon nga mag-amendar sa pipila ka provision sa Consumers Act of the Philippines.

Kun mahimo na’ng balaud ang gisugyot nga kausaban ni Gatchalian, kasilotan na ang mga tindahan nga dili mohatag sa husto nga sukli ngadto sa ilang mga customer.

Kita’ng tanan, nakasinati niini’ng naandan na nga practice sa mga cashier, o kining nagbantay sa mga counter sa mga mall, nga moingon: “Kuwang ra ba’g 20 sentabos ang sukli, Sir o Ma’am … OK lang ka?”

Pila ra go’y 20 sentabos. Okay lang, labi na’g muandar ang atong pagka-hambugero, daghan ra ba ang nakadungog. Pila kaha ka 20 sentabos ang mahipos sa cashier tibuok adlaw?

Kini, supak na unya sa balaud, ug kapahamtangan na’g silot ang violator. Usahay, suklian lang ta’g candy ug ubang mga butang ilis sa salapi nga sukli.  Arang-arang na lang unta to’g mahalon o imported nga candy. Usa kini ka panglupig, shortchanging sa mga tindahan. Usahay ikaw pa’y hatagan og problema pagpangita’g sensiyo.

Inigdayon nimo’g bayad, pangutan-on kag “duna kay 25 sentabos diha Sir, Ma’am? Mabawo ka’g kuot sa bulsa o sa pitaka, pagpangita’g sensiyo.

Hinaut nga mahimo’ng balaud kining gisugyot ni Kongresista Gatchalian aron mapugos ang mga tindahan pag-andam og daghang igsusukli ug dugang kapanalipdan ang atong mga katungod isip mga consumer batok sa mga pangilad, o deception sa katindahanan.

Gamay ra ni’ng butanga, no big deal, matud pa, apan, in my case, for instance, ambot pila na ka 20 sentabos ang nahabilin nako sa mga mall sulod sa kapin sa 50 ka tuig nako’ng pagpangompra? Ikaw?