Senior nga himsog pa

Kun moabot na sa edad nga 60, masakop kana sa hut-ong sa mga ‘senior’. Daghan nang dawatonong benepisyo, usa na niini ang 20% diskwento sa bayranang serbisyo o konsumo sa senyor. Unya adunay pinansiyal tabang pa kada bulan o kada 3ka bulan. Kun makaabot pag 100 pataas ang edad, ma-promote na pagka-‘supersenior’. May award ug reward pang 100,000pesos.

Gihimo kini sa atong gobiyerno, aron dasigon o mahagit sa pagpakabana nga ma-edukar sa hustong pag-atiman sa maayong panglawas. Ang atong mga batan-on karon gitinguha nga makaabot sa senior o supersenior, kay gituhoan nga may dako pang mahimo sa pag-abag alang sa mas malambuon nga nasud.

Unya may plano nga tungod kay himsog pa ang senior, mahatagan kini’g higayon nga makatrabaho sa mga buhatan o kompaniya, nga magdepende sa katakos sa abilidad o kondisyon sa lawas. Kay ang mga senyor karon sagad, bisan gusto pa motrabaho apan di na kasugakod tungod kay nag-agayay na.

Karon pa lang, kadtong umaabot nga senyor, gikinahanglan sugdan nang  buhaton nga  mahusto ang estilo sa kinabuhi, mentras di pa ulahi ang tanan. Himoang nag-unang prayoridad kini sa atong inadlaw nga responsibilidad. Tun-an pag-ayo nga dili mainutil sa kabatan-on, nga seguroon gyud ang kahimsog.

Mag-unsa man ang kaayo sa pangandam mo sa kaugmaon, daghan ka mag napundar nga katigayonan, apan mahurot lang gihapon kay ang lawas  nagkinahanglan man igawas ang tanang bahandi alang sa imong mga sakit. Ang maayo’g lawas, dali ra moasenso. Apan pait kun abusado kita sa lawas.