Nahulog sa lit-ag

Daghan ang wala kasabot sa baruganan ni Cebu Archbishop Emeritus Ricardo Cardinal Vidal sa panawagan pagpakanaug ni Presidente Benigno Aquino III sa iyang katungdanan gumikan niining laing dako nga kontrobersiya.

Puwerte nga nakapanghimakak sa kampo ni Vidal sa mga taho nga usa siya sa nag-unang personalidad kinsa nagpaluyo sa lakang karon pagpa-resign sa presidente tungod sa dakong bulilyaso nga miresulta sa SAF massacre didto sa Mamasapano, Maguindanao.

Wala kunoy kalambigitan ang cardinal niini. Ug nga na-misunderstood lamang kuno ang presensiya ni Vidal kauban sa kadagkoan sa National Transformation Council nga nakigkita kaniya sa niaging semana.

Apan dili usab nato mabasol ang publiko nga magtuo nga kabahin si Vidal sa mao nga grupo nga kugi karon sa ilang krusada batok ni Aquino. Tungod kay paborito sa NTC nga bisitahon ang cardinal, dili kalikayan sa katawhan ang magtuo nga usa siya sa mga haligi niini.

Gani si Vidal pa mismo ang nagbasa sa mensahe sa maong grupo matag tigum nila dinhi sa Sugbo. Ug dili lamang ka usa kun dili ka duha na ang ilang pagpakigtagbo sa respetado nga cardinal.

Apan nganong ilihay pa man sa kampo ni Vidal ang iyang asosasyon uban sa NTC? Tungod ba kay dili sila gusto nga maakusahan unya ang cardinal nga usa sa nagpaluyo pag-destabilize sa administrasyon ni Aquino?

Kun wala gyuy plano si Vidal nga mouban sa kawsa nga kamulong nagsing-al pagpakanaug sa presidente gikan sa iyang puwesto, wala na lamang unta siya mo-starring sa mga tigum sa NTC dinhi.

Hinuon seryoso ang kampo sa cardinal sa ilang baruganan nga wala gayud kini koneksiyon sa kawsa batok sa Aquino administration. Ug sa akong nakita, gigamit lamang si Vidal sa NTC aron lagi makadani og dugang simpatiya. Klaro nga nahulog si Vidal sa lit-ag sa mao nga grupo. Ug karon, wala ug tuo na ang pagpanagang sa iyang kampo.