Husto si Senador Miriam
Gikastigo og kasaba ni Senador Miriam Defensor-Santiago ang mi-resign nga si PNP Chief Alan Purisima tungod sa pag-apil-apil niya sa operasyon sa kapolisan bisan og gisuspenso na siya sa katungdanan.
Ang senador nagkanayon nga tungod sa pag-apil-apil ni Purisima sa kalihukan sa kapolisan gipang-ihaw sa mga sakop sa Moro Islamic Liberation Front (MILF) ug Bangsamoro Independent Freedom Fighters (BIFF) ang 44 ka sakop sa PNP Special Action Force.
Gikuwestyon usab ni Miriam si Purisima tungod sa walay pagsalig niini ngadto kang DILG Secretary Mar Roxas ug Acting PNP Chief Leonardo Espina.
Matud pa sa senador nga posible’ng dili unta maihaw sa MILF ug BIFF ang mga SAF commandos kun gipahibawo pa unta ni Purisima sila si Roxas ug Espina.
Husto si Miriam sa iyang pagtoo nga walay pagsalig si Purisima kang Roxas ug Espina tungod kay si Purisima kauban sa laing grupo sa mga gamhanan sa Malakanyang.
Sayud kita nga adunay duha ka grupo sa mga gamhanan ang nagpalibot ni Pangulong Noynoy Aquino ug kini mao ang grupo nila ni Executive Secretary Paquito Ochoa ug Secretary Mar Roxas.
Kun wala mo malimot, dili ba sila man si Ochoa ug Purisima ang nagdala sa bola sa Oplan Exodus? Pero tan-awa, tungod sa iyang kagamhanan, nawala ang iyang pangalan sa mga angayang imbestigahon.
Mao pud ni ang rason ngano’ng wala ko mitoo ni’ng nagpadayon karon nga imbestigasyon kay klaro na man kaayo ang tumong -- ang pagtabon sa kamatuoran.
- Latest
