Sabut-sabot di maayo’ng idayon

Dako gayud unta kaayo ang tinguha ni Presidente Aquino nga makab-ot na ang kalinaw sa gubot nga bahin sa Mindanao.

Tungod niini nagtudlo siya og mga representante sa kagamhanan nga moumol og kasabutan uban sa kadagkoan sa Moro Islamic Liberation Front (MILF).

Dako’ng kantidad nga salapi ang gigahin sa kagamhanan alang sa maong sabut-sabot sa kalinaw sanglit didto man gayud kini ipahigayon sa  Malaysia. Sa maong sabut-sabot sa kalinaw nagtuo gayud ang katawhang Pilipinhon nga magmalampuson na si Presidente Aquino sa gisugyot nga Bangsamoro Basic Law nga iyang gitinguha nga maaprobahan sa dili pa matapos ang iyang termino karong sunod tuig.

Tungod sa tinguha ni Presidente Aquino nga makab-ot ang kalinaw pinaagi sa sabut-sabot tali sa MILF, mitumaw ang laing grupo nga Bangsamoro Islamic Freedom Fighter ( BIFF) nga supak sa sabot-sabot sa MILF ug kagamhanan.

Ang katawhang Pilipinhon ingon sa wala lang g’yud magpakabana sa gikatakda na unta nga pagtuki sa Bangsamoro Basic Law kay gituohan man nga makahatag kini og kaayohan.

Kini taliwala sa hipanglantawan nga mga hulga sa pagpasiugda og kagubot sa BIFF ug Moro National Liberation Front (MNLF) ingon man sa mga sakop sa Abbu Sayaff nga wala malakip sa sabut-sabot sa kalinaw.

Nabaraw ang gikatakda na unta nga pagtuki sa Bangsamoro Basic Law tungod sa dugoon nga hitabo didto sa Mamasapano, Maguindanao nga mikalas og 44 ka sakop sa PNP Special Action Force (SAF).

Ang tumong sa SAF mao ra g’yud unta ang pagdakop sa duha ka banggiitan nga terorista nga sila si Marwan ug Abdul Basit Usman nga naghulga sa kalinaw, dili lang sa nasud, kun dili sa tibuok kalibutan. Apan klaro kaayo nga dili sinsero ang MILF nga makab-ot ang kalinaw sa Mindanao kay gitugotan man nila nga sila si Marwan ug Usman makatago sa ilang gidominar nga teritoryo.

Tungod niini dili maayo nga ihinayon ang sabut-sabot sa kalinaw sa pipila ka bahin sa Mindanao.