Pagkabayo sa Mamasapano
Labihan kamasakiton ni Cebu Archbishop Emeritus Ricardo Cardinal Vidal nga wa siya manginlabot sa bisan unsang kalihokan atol sa lima ka adlaw nga pagduaw ni Pope Francis sa Pilipinas sa niaging buwan (Enero 15-19). Human diriyot mamatay tungod sa labing uwahing pagkahiagom sa pneumonia nga nakapabilin niya sa Perpetual Succour Hospital sud sa dul-an sa buwan sa niaging tuig, giawhag sa mga doktor sa di una paggawas sa iyang pinuy-anan.
Apan wa ning kapugong sa mga alyado ni kanhi presidente Gloria Arroyo sa paggamit ni Kardinal Vidal sa labing bag-o nilang kawsa: Ang pagkabayo sa engkuwentro sa Mamasapano, Maguindanao nga nipatay sa 44 ka sakop sa Special Action Force (SAF) sa Philippine National Police (PNP).
* * *
Ang mga alyado ni Arroyo, nga nagpasilong sa National Transformation Council (NTC) ug gipangulohan nilang kanhi defense secretary ug national security adviser Norberto Gonzales, kanhi senador Francisco Tatad ug mga obispo nga suod ni Arroyo, nipabasa ni Kardinal Vidal sa ilang pamahayag pag-awhag sa resignasyon ni Presidente Noynoy Aquino tungod sa trahedya sa Mamasapano.
Di na hinuon bag-o ang awhag sa NTC. Una ni nilang gihimo sa Lipa City, Batangas ubos ni Lipa Archbishop Ramon Arguelles niadtong Agosto 27, 2014. Kay wa man kamugna og kisaw, gipabasa nila ni Kardinal Vidal ang pamahayag dinhi sa Sugbo niadtong Oktubre 1, 2014.
* * *
Pila ka adlaw human sa tigom sa NTC sa Sugbo na-ospital si Kardinal Vidal tungod sa kalisod sa pagginhawa. Human sa pila ka semana, na-ospital na sab tungod sa labing uwahi ug labing grabeng atake sa pneumonia.
Kinsay manalipod sa 83 anyos nga prinsipe sa Simbahang Katoliko gikan sa mga mapahimuslanon? Naglaom ang mga alyado ni Arroyo nga tungod sa kaligdong ni Kardinal Vidal madasig nila ang kinabag-an sa katawhan pagdason sa awhag sa resignasyon. Kun mahitabo ni, masaligon si Gonzales nga mosunod pag-alsa ang militar ug ang kapolisan, ug mapalagpot si Aquino sa katungdanan.
* * *
Sama sa unang duha ka pamahayag sa NTC, way lapad nga mga protesta nga niulbo sa kadalanan nga nidason sa awhag pagpakanaog ni Aquino sa Malakanyang. Di ni tungod kay way atraso si Aquino sa Mamasapano kon dili tungod sa kakuwestiyonable sa mga grupo nga nisakay sa kontrobersiya.
Nipirma sa pamahayag sa NTC silang Davao Archbishop Emeritus Fernando Capalla, nga maoy nangu sa Catholic Bishops Conference of the Philippines (CBCP) nga nagdumili pag-awhag sa resignasyon ni kanhi presidente Arroyo nga nag-atubang sa Hello Garcia ug ubang dagkong eskandalo niadtong 2005, ug ubang mga obispo nga gipasanginlang nanawat og SUVs ug kuwarta gikang Arroyo. Gawas pa, mas kahadlokan ang baruganan sa NTC mao nga human sa resignasyon ni Aquino sila ang mopuli sa pagduma sa nasud.
* * *
- Latest
