Pagpamomba momenus

Namatay man tuod ang 44 ka sakop sa PNP Special Action Force (SAF) apan bugti niini nagkulit kini og dako’ng kalampusan nga makabenepisyo ang katawhan.

Dunay nindot kaayo nga inpormasyon nga akong nakuha kabahin sa kampanya sa kagamhanan pagpangita aron dakpon si Abdul Basit Usman, ang pangabaga ni Marwan nga giingong nasamdan sa enkuwentro.

Nangita ko’g paagi nga akong makontak ang usa ka dako’ng opisyal sa kagamhanan nga mokonpirmar sa nakuha nako nga report apan wala pa mobulig kanako ang kahigayonan.

Dili lang usa nako ibutyag ang mga detalyi, apan naglambigit kini sa isyu didto sa Mamasapano, Maguindanao.

Husto ang giingon ni DILG Secretary Mar Roxas nga tungod sa kamatayon ni Marwan, ang Indonesian terrorist, mamenus-menosan ang pagpamomba sa mga sakop sa Bangsamoro Islamic Freedom Fighters.

Kadto si Marwan maoy nagpasiugda sa mga pagpamomba sa Mindanao ug gitudloan niya ang mga sakop sa BIFF, sigurado ko nga apil usab nga gitudloan ang mga sakop sa MILF.

Giangkon ni Mar Roxas nga bisan og wala siya pahibaw-a sa kadagkoan sa SAF ug ni kanhi PNP Chief Alan Purisima diha nga gihimo ang SAF operation didto sa Maguindanao, apan lehitimo gihapon kadto nga kalihukan.

Mao nga kay patay na man si Marwan, lauman nato nga wala na unta’y pagpamomba, ilabi na sa mga dapit nga daghang tawo. Makalibog bitaw kun ngano nga ang mga MILF dili man motudlo kun asa ang mga dakponon sa balaud nga kalinaw man kaha ang ilang gilantaw? Husto ang pamahayag ni Roxas nga ang tumong karon sa kagamhanan mao nga dili na masubli ang hitabo didto sa Maguindanao nga napatyan og daghang tropa ang kapolisan.

Ikaduha, malaumon kita nga unta mailhan ug madakpan ang mga tawo nga miamong-among sa mga napatay na nga SAF. Siyaro, ang atong militar mahadlok mosulod didto sa Maguindanao?

* * *

Ang sipyat sa mga opisyal sa Mandaue mao nga gitugotan nila ang mga kontraktor nga mibutang sa dagko kaayo’ng “box culvert” daplin sa karsada gikan sa Highway paingon sa Barangay Bakilid.

Nakaagi ko kagahapon sa mao nga lugar ug akong nakita nga ang usa ka “lane” sa karsada nga kaagian unta og mga sakyanan dili na magamit kay adunay mga gipangbutang nga box culverts.

Angay’ng huna-hunaon ni Mayor Jonas Cortes ug sa ubang mga opisyal sa Mandaue nga angayan kini nga dili itugot, apil ang mga sakyanan sa kontraktor nga anha ra iparada daplin sa karsada.